देश र दुनियाँको खबरको लागि मध्यबिन्दु समाचार एप्लिकेसन डाउनलोड गर्नुहोस्! डाउनलोड गर्नुहोस् →

एमालेको १०औं महाधिवेशन चितवनमा, व्यवस्थापनको जिम्मा बादललाई

0

काठमाडौं  – नेकपा एमालेको १० औँ महाधिवेशन चितवनमा हुने भएको छ । बिहीवार बसेको पार्टी स्थायी कमिटी बैठकले पार्टीको यही मङ्सिर १० देखि १२ गतेसम्म हुने पार्टीको महाधिवेशन चितवनमा गर्ने औपचारिक निर्णय गरेको हो ।

यसअघि विधान महाधिवेशनको समापनको क्रममा अध्यक्ष ओलीले पार्टीको १० औँ महाधिवेशन बुटवलमा गर्ने घोषणा गरेका थिए । तर बिहिबारको बैठकले पार्टीको १० औँ राष्ट्रिय महाधिवेशन चितवनमा गर्ने निर्णय गरिएको पार्टीका प्रवक्ता प्रदीप ज्ञवालीले जानकारी दिए ।

बैठकले पार्टी स्थायी कमिटीका सदस्य रामबहादुर थापाको संयोजकत्वमा २१ सदस्यीय महाधिवेशन मूल व्यवस्थापन कमिटीसमेत गठन गरेको छ । प्रवक्ता ज्ञवालीले महाधिवेशन मूल व्यवस्थापन कमिटीमा नेताहरू योगेश भट्टराई, सुरेन्द्र पाण्डे, विष्णु रिमाल, काशीनाथ अधिकारी, डा. राजन भट्टराई, देवी ज्ञवाली, विनोद श्रेष्ठ, सीता पौडेल, आनन्द पोखरेल, कपिल पोखरेल, कृष्णभक्त पोखरेल, पार्वती रावलसहित सातै प्रदेशबाट एक/एक जना प्रतिनिधि र सम्पर्क समन्वय कमिटीबाट समेत एक जना प्रतिनिधि रहने बताए ।

बैठकले पार्टीको भर्खरै सम्पन्न विधान महाधिवेशन भव्यताका साथ सम्पन्न भएको निष्कर्ष निकाल्दै सहयोग गर्ने सबैप्रति धन्यवादसमेत दिएको छ । प्रवक्ता ज्ञवालीले भने, ‘पार्टीको भर्खरै सम्पन्न विधान महाधिवेशनको समीक्षा गरिएको छ । बैठकले त्याे महाधिवेशन अत्यन्त भव्य, अत्यन्त ऐतिहासिक  र सफल रहेको निष्कर्ष निकालेको छ । बैठकले महाधिवेशनलाई सफल पार्न ज–जसले सहयोग गर्नुभयो, उहाँहरू सबैलाई धन्यवाद ज्ञापन गर्ने काम गरेको छ ।’

एमालेले बाढी, पहिरो, हिमपात र डुबानलगायतका प्राकृतिक विपत्तिमा ठूलो जनधनको क्षति भएको उल्लेख गर्दै त्यसप्रति गहिरो दुःख व्यक्त गरेको छ । त्यसैगरी प्राकृतिक विपत्तिमा परि घाइते भएकाहरूको शीघ्र स्वास्थ्य लाभको कामना गर्दै राहत र उद्धारको काममा उचित व्यवस्था मिलाउन सरकारसँग माग गरिएको प्रवक्ता ज्ञवालीले बताए ।

अर्काे बैठक भोलि शुक्रवार दिउँसो २ बजे तुलसीलाल स्मृति प्रतिष्ठानमा बस्ने गरी बोलाइएको एमालेले जनाएको छ ।

द्वारा लेखिएको

मध्यबिन्दु

सम्बन्धित समाचार