(काठमाडौं) – काठमाडौं कोरोना भाइरस (कोभिड–१९) को संक्रमणका कारण नेपालमा तेस्रो व्यक्तिको मृत्यु भएको छ । कोरोना संक्रमित गुल्मीका ४१ वर्षीय पुरुषको उपचारका क्रममा रुपन्देहीमा मृत्यु भएको छ ।
योसँगै नेपालमा कोरोना भाइरसको संक्रमणका कारण मृत्यु हुनेको संख्या तीन पुगेको छ । गुल्मी मदाने गाउँपालिका–६ का उनमा सोमबार कोरोना संक्रमण पुष्टि भएपछि रुपन्देहीको मणिग्रामस्थित क्रिमसन अस्पतालमा भर्ना गरिएको थियो ।
ज्वरो आउने र रुघाखोकी लाग्ने भएपछि यही जेठ १ गते अस्पतालमा भर्ना भएका उनको उपचारको क्रममा बुधबार उनको मृत्यु भएको हो । यद्यपि स्वास्थ्य मन्त्रालयले औपचारिक घोषणा गर्न बाँकी छ ।
अस्पताल भर्ना भएको दिनदेखिनै भेन्टिलेटरको सहायतामा आइसीयूमा उनको उपचार भइरहको थियो । उनी गुल्मी मदाने–६ पुर्कोटदहको निमाविका प्रधानाध्यापक हुन् ।
यसअघि सिन्धुपाल्चोकको बाह्रबिसेकी सुत्केरी र बाँके नरैनापुरका क्वारेन्टाइनमा बसेका पुरुषको पनि कोरोनाकै कारण मृत्यु भएको थियो ।