देश र दुनियाँको खबरको लागि मध्यबिन्दु समाचार एप्लिकेसन डाउनलोड गर्नुहोस्! डाउनलोड गर्नुहोस् →

छहरे-टोखा सुरुङ मार्गको अवलोकन गर्न तीन मन्त्री एकैपटक नुवाकोटमा

0

काठमाडौं – नुवाकोटको बहुप्रतिक्षित छहरे-टोखा सुरुङमार्ग निर्माणस्थलको सोमबार संघिय सरकारका तीन जना मन्त्रीले एकैपटक अवलोकन गरेका छन्।

नुवाकोटको शिवपुरी गापा ७, ८ र टोखा नगरपालिकाको झोरमा निर्माण प्रस्तावित छहरे-टोखा सुरुङ्गमार्ग स्थलको निर्माण कार्यलाई अगाडि बढाउन संघीय सरकारका तीन जना मन्त्रीले एकैपटक आज अवलोकन गरेका हुन्।

छहरे-टोखा सुरुङमार्ग निर्माणका लागि वातावरणीय प्रभाव मूल्यांकनको कार्य अगाडि बढाउन अर्थमन्त्री डा. प्रकाशशरण महत, भौतिक पूर्वाधारमन्त्री प्रकाश ज्वाला र वनमन्त्री वीरेन्द्र यादवलगायतको टोलीले निर्माणस्थलको स्थलगत अवलोकन गरि स्थानीयवासीसँग अन्तर्क्रियासमेत गरेको शिवपुरी गाउँपालिका अध्यक्ष गोविन्द थपलियाले बताए ।

उनका अनुसार सडकमार्ग हुँदै काठमाडौंबाट शिवपुरी गापा पुगेका तीनै जना मन्त्रीसहितको टोलीले दुई घण्टासम्म स्थलगत अध्ययन गरेको हो।

चार दशमलव तीन किलोमिटर दूरीको सो सुरुङमार्गको निर्माणपछि नुवाकोट, रसुवामात्रै नभई नेपाल र उत्तरी छिमेकी चीनको दूरी निकै छोटो हुनेछ। हालः काठमाडौंदेखि रसुवागढीसम्मको दूरी एकसय ५२ किलोमिटर रहेको छ।

अर्थमन्त्री डा. महतले केही दिनभित्रै वातावरणीय प्रभावका बारेमा प्रतिवेदन तयार हुने र सो प्रतिवेदन चीन सरकारलाई बुझाए लगत्तै काम सुरु गर्ने विषयमा चीन सरकारसंग प्रस्ताव गर्ने बताए।

छहरे-टोखा सुरुङमार्ग निर्माण का विषयमा चीन सरकार सकारात्मक रहेकोसमेत डा. महतको भनाइ छ । प्रधानमन्त्रीको चीन भ्रमणका समयमा चीन सरकारसँग नेपालले छहरे-टोखा सुरुङ मार्ग निर्माणलाई विशेष प्रस्तावका रुपमा राख्नेसमेत अर्थमन्त्री डा. महतले बताएको स्थानीय इन्दिरा थापाले जानकारी दिइन् ।

थापाका अनुसार प्रधानमन्त्रीको चीन भ्रमणअघि नै वातावरणीय प्रभाव मूल्यांकन गर्ने उद्देश्यकासाथ सरकारका मन्त्री आफैं सुरुङ मार्ग निर्माणस्थलको अवलोकनका लागि पुगेका हुन्।

द्वारा लेखिएको

मध्यबिन्दु अनलाइन

सूचना विभाग दर्ता नं. दर्ता न. १७८८/०७६-७७

सम्बन्धित समाचार