देश र दुनियाँको खबरको लागि मध्यबिन्दु समाचार एप्लिकेसन डाउनलोड गर्नुहोस्! डाउनलोड गर्नुहोस् →

नेपाल प्रहरीमा एक एआईजी र ५ डीआईजीको दरबन्दी थप

0

काठमाडौं – सरकारले नेपाल प्रहरीमा एक जना प्रहरी अतिरिक्त महानिरीक्षक (एआईजी) र पाँच जना प्रहरी नायब महानिरीक्षक (डीआईजी) को दरबन्दी थप गरेको छ ।

नयाँ दरबन्दी कायम भएसँगै प्रहरी अधिकारीहरूलाई बढुवाको बाटो खुलेको छ । दरबन्दी थप भएसँगै प्रहरी प्रधान कार्यालयले रिक्त पदमा बढुवाको तयारी थालेको छ । एआइजी प्रतिस्पर्धामा डीआइजीहरू विश्वराज पोखरेल, सहकुल बहादुर थापा, धीरजप्रताप सिंह, उत्तम सुवेदी लगायत छन् ।

यस्तै, पाँच डीआइजी मध्ये एक जनाको साइबर ब्युरोमा दरबन्दी कायम गरिएको छ । बाँकी चार जना डीआइजी प्रहरी प्रधान कार्यालयमा रहने छन् । अब राजधानीको सुरक्षामा ‘संघीय राजधानी प्रहरी’ गठन हुन्छ । पहिले राजधानी बागमती प्रदेश मातहत थियो । अब राजधानीका तीन जिल्ला संघीय राजधानी प्रहरी मातहत रहने छन् ।

संघीय राजधानी प्रहरी गठन हुने भएपछि हाल महानगरको अवधारणामा रहेको मेट्रो प्रहरी हट्नेछ । मेट्रोमा हाल प्रहरी नायब महानिरीक्षक (डीआइजी) को दरबन्दी छ । संघीय राजधानी प्रहरी अन्तर्गत काठमाडौं, भक्तपुर र ललितपुर रहने छन् । ती कार्यालय महानगरीय प्रहरी परिसरको रूपमा थिए । अब जिल्ला प्रहरी कार्यालय वा अन्य कुनै नाममा रहने छन् ।

गृह मन्त्रालयले पाँच डीआईजीको दरबन्दी थप्नुपर्ने राय दिंदै स्वीकृतिका लागि संगठनात्मक स्वरुप निर्धारण (ओएण्डएम) मन्त्रिपरिषद्मा पठाएको थियो । तर, सरकारले एआईजीको दरबन्दी समेत थप गरेर स्वीकृत गरेको हो ।

प्रहरीमा हाल प्रशासनतर्फ १४ र प्राविधिक ८ गरी २२ जना डीआईजी छन् । यसअघि प्रशासनमा २६ जना डीआईजी रहेकामा ठाकुरप्रसाद ज्ञवाली आईजीपी भएका बेला गृह मन्त्रालयले १४ वटा दरबन्दी कटौती गरेको थियो ।

द्वारा लेखिएको

मध्यबिन्दु

सम्बन्धित समाचार