Madhyabindu News App
राजनीति

नेकपाका नेता पाण्डेविरुद्ध चितवनमा नाराबाजी

Madhyabindu Online

चितवन – नेकपाका नेता सुरेन्द्र पाण्डेविरुद्ध पार्टी एकताबिरोधी भन्दै गृहनगरकै कार्यकर्ताहरूले नाराबाजी गरेका छन्। पार्टीका वरिष्ठ नेता माधवकुमार नेपालनिकटका स्थायी समिति सदस्य पाण्डेले पार्टी अध्यक्ष तथा प्रधानमन्त्री केपी शर्मा ओलीविरुद्ध आक्षेप लगाउने काम मात्र गरेको भन्दै कार्यकर्ताले नाराबाजी गरेका हुन्।

राप्ती नगरपालिकाको विरेन्द्रनगरमा गरिएको अगुवा कार्यकर्ता भेलामा पुगेका पाण्डेलाई ओली समर्थित कार्यकर्ताले पार्टी एकताबिरोधी भन्दै लखेट्ने प्रयास गरेका थिए। उनीहरूले पार्टी एकता जिन्दावाद, पार्टी फुटाल्न पाइँदैनलगायतका नारा लगाएका थिए।

पाण्डेले मदन भण्डारी फाउण्डेशनमार्फत गुटबन्दी भएको बताएपछि ओली समर्थित कार्यकर्ताहरू नाराबाजीमा उत्रिएका थिए। पाण्डे चितवन जिल्ला क्षेत्र नम्बर १ बाट प्रतिनिधिसभामा निर्वाचित सांसद हुन्। कार्यक्रम भएको स्थान उनको निजी निवासबाट नजिकै पर्छ।

पार्टीको राप्ती नगरपालिका कमिटीले आयोजना गरेको कार्यक्रममा विकास निर्माण तथा संसद विकास कोषको विषयमा छलफल गर्ने भनिए पनि यस विषयमा कुरा नगरी पार्टी अध्यक्ष तथा प्रधानमन्त्रीविरुद्ध खनिएको भन्दै कार्यकर्ताले कार्यक्रम नै बिथोलिदिएका थिए।

यो घटनाको पूर्वप्रधानमन्त्री तथा वरिष्ठ नेता माधवकुमार नेपालले विज्ञप्ति जारी गरेरै विरोध गरेका छन्।

‘राप्ती नगर पार्टीको बैठकमा सहभागी भई मन्तव्य राखिरहेको बेला अनधिकृत रूपमा प्रवेश गरेका केही व्यक्तिहरूले सुनुयोजित रूपमा गरेको अभद्र व्यवहार तथा नाराबाजीको निन्दा एवम् भर्त्सना गर्दछु,’ नेपालले भनेका छन्, ‘सभ्य, सुसॅस्कृत एवम् समुन्नत समाज निर्माण गर्ने उद्धेश्य बोकेको कम्युनिष्ट आदर्श अबलम्वन गर्ने लोकतान्त्रिक कम्युनिष्ट पार्टीका लागि पटक्कै नसुहाउने उक्त कार्य गर्ने/ गराउने जोसुकै भएपनि छानबिन गरी कडा भन्दा कडा कारबाही गर्न स्थानीय पार्टी एवम् सम्बन्धित सबैको ध्यानाकर्षण गराउँछु।’ विज्ञप्तिमा उल्लेख छ ।

Tags

छुटाउनु भयो कि ?