Madhyabindu News App
स्थानीय तह

ठूला पार्टीका नेताहरूले नै फोहोर व्यवस्थापनमा अवरोध गरे – मेयर बालेन

Madhyabindu Online


A A- A+

काठमाडौं – काठमाडौँ महानगरपालिकाका प्रमुख बालेन्द्र शाह (बालेन)ले उपत्यकाको फोहोर व्यवस्थापनमा सत्तारुढ दलका नेताकै अगुवाइमा भएको प्रदर्शनले आज पनि सोचेअनुसार काम हुन नसकेको बताएका छन्।

बालेनले सत्तारुढ दलका नेताको अगुवाइ र विपक्षी दल एमाले र राप्रपाका स्थानीय नेताको समर्थमा भएको विरोध प्रदर्शनका कारण फोहोर व्यवस्थापनमा कठिनाई भएको बताएका हुन्।

विरोधकै बीच २ सयभन्दा बढी प्रहरी परिचालन गरेर २ सय ३ वटा फोहोर बोकेका गाडी बन्चरेडाँडा पुर्‍याउन सकिएको उनको भनाइ छ।

बालेनको भनाइ जस्ताको तस्तै –

– फोहोर लैजाने कुरा आज पनि सहज भएन। सत्तारुढ दलहरुकै स्थानीय नेताहरुको अगुवाइमा सडक अवरुद्ध गरियो, जसलाई विपक्षी दलहरु एमाले र राप्रपाका स्थानीय नेताहरुले पनि साथ दिएको देखियो। यद्यपि २०० भन्दा बढि प्रहरीहरुको परिचालनबाट फोहोरका गाडीहरु बञ्चरे लगियो। तर केहि समूहबाट लुक्दै गुलेली हानेर अवरोध सिर्जना गर्ने प्रयास गरियो। यसैकारण आज २०३ वटा मात्र फोहोरका गाडीहरु बञ्चरे डाँडा लैजान सकियो।

केहिदिन र केहि समयबाट देखिरहेको समस्या सतही मात्रै हो। यसका गहिरा र अलग्गै कारणहरु छन्। नत्र सोच्नुहोस् त, राज्यले ५ अर्बभन्दा बढि लगानी गरिसकेको, झन्डै २ दशकदेखि योजना बनाएको ठाउँमा फोहोर लैजान यतिका माथापच्ची किन गर्नु पर्छ ? २०० भन्दा बढी प्रहरी परिचालन गर्दा पनि स्थानीयले लुक्दै गुलेली हान्न सक्ने अवस्था किन बन्छ ? पुरै राज्य संरचना यस्तो निरिह किन बन्छ ? 

यहाँ केहि कमजोरी, केहि गल्ति भएकै छ। सिसडोलमा गरिएको लापरवाही र त्यो क्षेत्रको दुरवस्थाले गर्दा स्थानीयहरुले जोसुकैलाई विश्वास गर्न नसक्नु अस्वभाविक पनि होइन। तर हामी विश्वस्त पार्न चाहन्छौँ कि विगत दोहोर्याएर अपराध गर्ने छैनौँ। यसका लागि केहि समय भने पक्कै लाग्छ। सिसडोलको वैज्ञानिक व्यवस्थापन र बञ्चरेको दिगो उपयोगीताका लागि महानगर संवेदनशील छ। हामी आफुले गरेका सहमतिहरुको पालना गर्नेछौँ। सबै पक्षबाट हामी त्यहि किसिमको संवेनशीलता र इमान्दारिताको अपेक्षा राख्दछौँ। 

पुन: भन्न चाहन्छौँ, व्यवस्थापन हाम्रो स्वार्थहरुको गर्नु पर्ने होइन, फोहोरको हो। आफ्ना कुत्सित स्वार्थहरुको व्यवस्थापन महानगरले गरिदेला भन्ने सोच्नु भएको छ भने त्यो भ्रम हो। त्यसो भन्दैमा कसैलाई हराउने खेलमा महानगर छैन। सबैले जित्ने कार्यक्रम लागू गर्ने योजनामा महानगर छ। 

छुटाउनु भयो कि ?