काठमाडौं – २३औँ विश्व दूध दिवस विभिन्न कार्यक्रम आयोजना गरी मनाइने भएको छ। ‘दुध क्षेत्रको दिगो विकास- समृद्धीको आधार’ भन्ने मुल नाराकासाथ २३औँ विश्व दूध दिवस मनाउन लागीएको हो ।

राष्ट्रिय दुग्ध विकास बोर्डको संयोजकत्वमा सरोकारवाला निकाय, पशु सेवा विभाग, दुग्ध विकास संस्थान, केन्द्रीय दुग्ध सहकारी सङ्घ लिमिटेड, नेपाल डेरी एशोसिएसन, डेरी उद्योग सङ्घ, केन्द्रीय पशुपक्षी मत्स्य सहकारी सङ्घलगायत सरोकारवाला निकायले विश्व दूध दिवसका अवसरमा आज विभिन्न कार्यक्रम गर्दैछन्।

विश्वमा दुग्ध क्षेत्रले पोषण तथा खाद्य सुरक्षण एवं जीविकोपार्जनमा पुर्याएको योगदानको कदर गर्दै दूधको उपभोगमा वृद्धि गर्न संयुक्त राष्ट्रसङ्घको खाद्य तथा कृषि सङ्गठन (एफएओ)ले सन् २००१ जुन १ देखि विश्व दूध दिवस मनाउन थालिएको हो। आम जनताबीच दूधको उपभोग गर्न चेतना फैलाउने उद्देश्यले नेपालले पनि सन् २०११ देखि  विश्व दूध दिवस मनाउन थालेको हो।

दैनिक गुणस्तरीय दूध पिउन चेतना जगाउने, पोषणयुक्त दूध तथा दुग्ध पदार्थको उपभोग वृद्धि गर्न प्रचार–प्रसार गर्ने, दूध तथा दुग्ध पदार्थको गुणस्तर कायम गर्न चेतना जगाउने र दूध तथा दुग्ध पदार्थको उपभोगमा सबैको पहुँच पुर्याउन पहल गर्ने उद्देश्यले यो दिवस मनाउने गरिन्छ।

नेपालमा प्रशस्त मात्रामा दुधको उत्पादन हुने अवस्था भएपनी केही बिचौलियाको चलखेलकाकारण सरकारको ध्यान नेपाली उत्पादनलाई प्रोत्साहन गर्नुभन्दापनी भारतीय दुध आयात गर्नेतिर लाग्नु दुखद भएको पञ्चामृत डेरी उद्योगका अध्यक्ष माधब कुमार बस्नेत बताउँछन् ।

दुध व्यवसायीहरुले उत्पादित वस्तुमा अस्वस्थ प्रतिष्पर्धा गर्नुभन्दा व्यवसायीक रुपमा दुध उत्पादनमा केन्द्रितहुनु जरुरी रहेको उनको भनाई छ ।