(काठमाडौं) – स्रोत नखुलेको ३५ लाख ५० हजार रुपैयाँसहित बाराबाट २ जना पक्राउ परेका छन् । पक्राउ पर्नेमा बाराको सिम्रौनगढ नगरपालिका– ७ झवानी टोल बस्ने २३ वर्षीय सुनिल महतो नुनिया र २२ वर्षीय राजन कुमार दुवे छन् ।
अवैध रुपमा हुण्डीको पैसा लिई दुई जना व्यक्तिहरु मोटरसाइकलमा आउँदै गरेको भन्ने सूचनाको आधारमा प्रहरीले सोमबार दिउँसो साढे १ बजे उनीहरुलाई नियन्त्रणमा लिएको थियो ।
बाराकै पचरौता नगरपालिका–८ लंगडी चोकबाट उनीहरुलाई नियन्त्रणमा लिइएको जिल्ला प्रहरी कार्यालय बाराले जनाएको छ ।
उनीहरु पूर्व सिम्रौनगढतिरबाट महेन्द्र आदर्श तर्फ ना २६ प १६४९ नम्बरको मोटरसाइकलमा आउँदै थिए । पिठ्युँमा बोकेको झोला चेकजाँच गर्दा नेपाली रुपैयाँ १ हजार दरको १२ सय थान र पाँच सय दरको ४ हजार ७ सय थान गरी जम्मा ३५ लाख ५० हजार रुपैयाँ फेला परेको जिल्ला प्रहरी कार्यालय बाराका प्रवक्ता रञ्जित सिंह राठौरले जानकारी दिए ।