काठमाडौँ – राष्ट्रिय एकता अभियानले संघीय हिन्दू गणतन्त्र स्थापना गरेरै छाड्ने अवधारणा पत्र सार्वजनिक गरेको छ । आइतबार बत्तीसपुतलीमा आयोजित कार्यक्रममा राजनीतिक दलका नेताहरुसँगै अभियानका संयोजक विनय यादवले अवधारणा सार्वजनिक गरेगरेका हुन् ।
कार्यक्रमका प्रमुख अतिथि पूर्वउपराष्ट्रपति परमानन्द झाले दोस्रो जनआन्दोलनपछि निर्माण गरिएको अन्तरिम संविधानमा कसैलाई जानकारी नै नदिई धर्म निरपेक्षता घुसाइएको बताए । आफू तत्कालीन उपराष्ट्रपति हुँदा पनि आफूले पत्तो नपाएको उनको भनाइ थियो।
कार्यक्रममा बोल्दै कांग्रेस केन्द्रीय सदस्य तथा पूर्वमन्त्री शंकर भण्डारीले हाम्रो मुलुक बन्नुअघिदेखि नै सनातन संस्कार, संस्कृति र हिन्दूत्वको पदार्पण भएको बताए। ‘हामीले हाम्रो सनातन धर्म, संस्कार, संस्कृतिको रक्षा गर्न सक्यौं भने संसारको सबैभन्दा शक्तिशाली मुलुक नेपाल बन्नेछ,’ उनले भने ।
अभियानका अध्यक्ष विनय यादवले नेपाललाई जोड्ने आधार नै सनातन संस्कृति रहेकाले त्यसका जगेर्ना गर्दै मुलुक र मुलुकवासीलाई जोडिराख्न संघीय हिन्दू गणतन्त्र मात्र विकल्प रहेको बताए ।
हिन्दू धर्म मजबुत रहुन्जेल नेपालको राष्ट्रियता पनि मजबुत हुने उनले बताए । ‘राष्ट्रियता पसलमा खरिद गर्न मिल्ने वस्तु होइन, अनादिकालदेखि चलिआएको संस्कृति नै राष्ट्रियताको आधार हो,’ उनले भने, ‘नेपालमा अनादिकालदेखि चलिएको संस्कृति सनातन संस्कृति हो ।’