काठमाडौं – काठमाडौं महानगरपलिकाका प्रमुख बालेन शाहले नेपालका जुनसुकै पालिकाका गरिब तथा असहायको काठमाडौं महानगरले उपचार गर्ने बताएका छन्।
आइतबार सामाजिक सञ्जालमार्फत् मेयर शाहले भनेका छन्, ‘नेपालको जुनसुकै पालिकाको भएपनि अशक्त र गरिब नागरिक बिरामीहरूले आफ्नो पालिकाबाट विपन्न, असहायको सिफारिस लिएर काठमाडौं महानगर आउनुहोला। हामीसँग ४३ अस्पतालका ३२३ बेड आबद्ध छन्, त्यहाँ बिरामीको आवश्यकता अनुसार निःशुल्क उपचार हुनेछ।’
यो सुचनाबारे टोल छिमेक वा आफन्तहरूलाई समेत जानकारी दिन समेत शाहले आग्रह गरेका छन्।
प्रमुख बालेनले त्यसबारे विस्तृत जानकारीका लागि महानगरपालिकाको स्वास्थ्य विभागको सम्पर्क नम्बर ११८० मा सम्पर्क गर्न समेत आग्रह गरेका छन्।
