काठमाडौं । चीनको कम्युनिस्ट पार्टीको केन्द्रीय समितिको अन्तर्राष्ट्रिय विभागले ‘मेरो नजरमा सीपीसी : छिमेकी देशका युवासँग संवाद’ शीर्षकमा उच्चस्तरीय आदान–प्रदान कार्यक्रम गरेको छ । उक्त कार्यक्रममा दक्षिण र दक्षिणपूर्व एशियाका १५ देशबाट १ सय युवा नेताहरू, थिंक ट्यांक विज्ञहरू, अन्तर्राष्ट्रिय विद्यार्थीहरू तथा उद्यम क्षेत्रका प्रतिनिधिहरूको सहभागी भएका थियो । बेइजिङमा आयोजित कार्यक्रममा आईडीसिपीसीका मन्त्री लिउ हाईसिङले मुख्य सम्बोधन दिएका थिए। त्यसपछि दक्षिण र दक्षिणपूर्व एशियाका नेताहरू तथा प्रतिनिधिहरूले मन्तव्य दिएका थिए।
पाकिस्तान, भुटान, टिमोर–लेस्ते, फिलिपिन्स, माल्दिभ्स, मलेसिया, बंगलादेश, म्यानमार, नेपाल, श्रीलंका, थाइल्याण्ड, ब्रुनेई, सिङ्गापुर, भारत र इन्डोनेसियाका युवा प्रतिनिधिहरू संवादमा सहभागी भएका थिए। सहभागीहरूले चीनका विभिन्न क्षेत्रहरूमा देखिएको विकासलाई प्रत्यक्ष अवलोकन गर्दा चीनको कम्युनिस्ट पार्टीको शासन दर्शनबारे आफ्नो बुझाइ अझ सुदृढ भएको बताएका छन्। धेरैले जनताकेन्द्रित नीतिहरूको प्रभावकारी कार्यान्वयन, सम्पूर्ण प्रक्रियामा आधारित जनताको लोकतन्त्रको विकास, र जनकल्याणलाई निरन्तर प्राथमिकता दिने पार्टीको प्रतिबद्धता उल्लेख गरेका थिए।
प्रतिनिधिहरूले विशेषगरी युवाको विकासमा चीनले गरेको रणनीतिक लगानी—नवप्रवर्तन, उद्यमशीलता र प्राविधिक तथा व्यवसायिक शिक्षामा दिएको समर्थन—लाई क्षेत्रीय स्तरमा अनुकरणीय मोडेलको रूपमा प्रशंसा गरेका थिए। केहीले आफ्ना देशका युवामाझ चीनबारे वस्तुनिष्ठ बुझाइ बढाउन सीपीसीसँग संस्थागत आदान–प्रदानलाई अझ गहिरो बनाउने इच्छा पनि व्यक्त गरेका थिए।
नेपालको तर्फबाट मनिषा श्रेष्ठले सीपीसी शासनबारे व्यक्तिगत विचार र अनुभव बाँडेकी थिइन् । नेपालको “फ्रेन्ड्स अन द क्लाउडस् प्लेटफर्म अफ इन्फ्लुएन्सर्स” की संयोजक मनिषा श्रेष्ठले बेइजिङ र युन्नान प्रान्तको भ्रमणका क्रममा प्राप्त आफ्ना परिवर्तनकारी अनुभवहरू साझा गर्दै उल्लेखनीय भाषण दिएकी थिइन्।
“अब म चीनको विकासलाई केवल चिनियाँ कथाको रूपमा मात्र देख्दिनँस यो जनतालाई केन्द्रमा राखेर गरिने शासनको विश्वव्यापी खाकाको रूपमा देख्छु,” श्रेष्ठले भनिन्। उनले चीनबारे आफ्ना अवलोकनका तीन प्रमुख प्रभावहरू प्रस्तुत गरिन्। युन्नानमा उनले गरिबी न्यूनीकरण कार्यक्रम अन्तर्गत स्थानान्तरण गरिएका परिवारहरूले स्वास्थ्य सेवा, प्रभावकारी सेवा केन्द्र र पुनर्जीवित समुदायबाट प्राप्त गरिरहेको लाभ प्रत्यक्ष देखेकी थिइन्। “त्यो वास्तवमै ‘राम्रो जीवन’ कस्तो हुन्छ भन्ने अनुभव थियो,” उनले बताइन्।
त्यसैगरी, महासचिव सी जिनपिङको प्रारम्भिक जरा–स्तरको अनुभवलाई स्मरण गर्दै श्रेष्ठले चीनको प्रणालीले युवा अधिकारीहरूलाई राष्ट्रिय दृष्टिकोणलाई स्थानीय प्रभावमा रूपान्तरण गर्न सक्षम बनाउने बताइन्। “चीनमा युवाहरूलाई आफ्ना आकांक्षाहरू साकार पार्ने अवसर दिइन्छ,” उनले भनिन्। उनले यसलाई नेपालका युवाले भोगिरहेका पूर्वाधारका चुनौतीहरूसँग तुलना गरिन्। अन्ततः श्रेष्ठले चीनको भ्रष्टाचारविरुद्धको प्रयास—गत वर्ष ३६,००० कर्तव्यसम्बन्धी अपराधका मुद्दाहरू समाधान गरिएको—लाई सीपीसीको आत्म–सुधारप्रतिको प्रतिबद्धताको प्रमाणका रूपमा उल्लेख गरिन्।
“भ्रष्टाचारविरुद्ध लडाइँ केवल नारामात्र होइन, आत्म–निरीक्षणको ठोस प्रक्रिया हो,” उनले भनिन् र नेपालका उदाउँदै गरेका नेताहरूले यसबाट प्रेरणा लिन सक्ने आशा व्यक्त गरिन्। महासचिव सी जिनपिङको भनाइ उद्धृत गर्दै—“भविष्य युवाहरूको हो, र आशा पनि युवामै निहित छ”—श्रेष्ठले नेपाली र चिनियाँ युवाबीच सहकार्यात्मक विकासमार्फत आत्मनिर्भरता, इमानदारी र जनताकेन्द्रित शासनलाई विश्वव्यापी रूपमा अघि बढाउन आह्वान गरिन्।
कार्यक्रमको अन्त्यमा चिनियाँ तथा विदेशी युवा प्रतिनिधिहरूबीच अन्तरक्रियात्मक छलफल भयो, जहाँ उनीहरूले अन्तरसांस्कृतिक समझदारी, डिजिटल सहकार्य तथा दिगो विकास साझेदारीलाई सुदृढ गर्ने उपायबारे विचार आदान–प्रदान गरे। चीनको कम्युनिस्ट पार्टीको केन्द्रीय समितिको अन्तर्राष्ट्रिय विभागका सहायक निर्देशक जिन सिनले सत्रको अध्यक्षता गरेका थिए।
आयोजकहरूका अनुसार “छिमेकी युवाहरूले सीसीपीलाई हेर्ने” पहलको उद्देश्य एशियाभरिका युवा नेताहरूलाई चीनको विकास यात्रासँग प्रत्यक्ष रूपमा जोड्ने स्थायी प्लेटफर्म सिर्जना गर्नु हो, जसले पारस्परिक सिकाइलाई प्रवर्द्धन गर्दै मानवजातिको साझा भविष्य निर्माणमा योगदान पुर्याउनेछ। क्षेत्रीय परिदृश्य परिवर्तन हुँदै जाँदा यस्ता युवाकेन्द्रित संवादहरूलाई दक्षिण र दक्षिणपूर्व एशियाभर दीर्घकालीन मित्रता, स्थिरता र समृद्धि प्रवर्द्धनका लागि महत्वपूर्ण मानिएको छ।