(हेटौंडा) – विभिन्न स्थानबाट मोटरसाइकल चोरीमा संलग्न गिरोहलाई हेटौंडाबाट प्रहरीले पक्राउ गरेको छ ।
शुक्रबार मकवानपुरका विभिन्न स्थानमा गरेको विशेष छड्के सुरक्षाजाँचको क्रममा चोरीको तीन वटा मोटरसाइकल सहित चार जनालाई प्रहरीले पक्राउ गरेको हो ।
हेटौंडा–१९ बाट चोरीको मोटरसाइकल सहित बारा कोल्बीका १८ वर्षीय निरञ्जन चौधरी र रौतहट गुजरा–४ का २२ वर्षीय राजकुपर चौधरीलाई पक्राउ गरेको जिल्ला प्रहरी कार्यालय मकवानपुरले जनाएको छ ।
यसैगरी मनहरी गाउँपालिका–७ स्थित पूर्वपश्चिम राजमार्गमा गरिएको सवारी चेकजाँचको क्रममा बारा निजगढ–४ का ३१ वर्षीय ज्ञानेन्द्र चौधरी र बारा कोल्बी–६, पर्सौनीका २२ वर्षीय धिरज चौधरीलाई बुलेट बाइक सहित प्रहरीले पक्राउ गरेको हो ।
उनीहरु चारै जनाले चितवनबाट मोटरसाइकल चोरी गर्दै ल्याउने क्रममा छुट्टाछुट्टै स्थानबाट प्रहरीले नियन्त्रणमा लिएको थियो ।
पक्राउ परेकामध्ये ज्ञानेन्द्र यसअघि जिल्ला अदालत मकवानपुरबाट मोटरसाइकल चोरी मुद्दामा धरौटीमा छुटेका व्यक्ति रहेको जिल्ला प्रहरी कार्यालय मकवानपुरले शनिबार पत्रकार सम्मेलन गरी जानकारी दिएको छ ।