काठमाडौं – नेपाल विद्यालय कर्मचारी परिषद्ले आफ्ना आन्दोलनका कार्यक्रमहरू सार्वजनिक गरेको छ। शुक्रबार बिहान पत्रकार सम्मेलन गरी परिषद्ले आन्दोलनका कार्यक्रम घोषणा गरेको हो ।
शिक्षक महासंघले विद्यालयका कर्मचारीहरूको मागलाई बेवास्ता गरी सरकारसँग सहमति गरेको भन्दै विद्यालय कर्मचारी परिषद् आन्दोलित बनेको हो ।
परिषद्ले आन्दोलनका कार्यक्रम पनि घोषणा गरेको छ । जसअनुसार यही २१ वैशाख आइतबारदेखि जेठ ३ सम्म कालोपट्टी बाँधेर कार्यक्षेत्रमा काम गर्ने गरी आन्दोलित हुने भएको छ ।
त्यस्ते जेठ ४ मा ७५३ वटै स्थानीय तहमा ध्यानाकर्षण पत्र बुझाउने तथा आन्दोलनबारे जानकारी गराउने कार्यक्रम घोषणा गरिएको छ । त्यस्तै जेठ ५ मा आन्दोलन परिचालन समिति गठन गर्ने कर्मचारी परिषद्ले जानकारी दिएको छ ।
त्यसैगरी जेठ ६ मा ७७ वटै शिक्षा विकास तथा समन्वय ईकाईमा ध्यानाकर्षणपत्र बुझाउने, ७ जेठमा सात वटै प्रदेशका सामाजिक विकास मन्त्रालयमा आन्दोलनको जानकारी गराउँदै ध्यानकर्षण पत्र बुझाउने परिषद्ले जनाएको छ ।
परिषदले यही जेठ ९ र १० मा काठमाडौं केन्द्रित आन्दोलन गर्ने जनाएको छ । जसमा माइतीघर मण्डलादेखि सडक आन्दोलन हुने जनाउँदै त्यसमा सबै उपस्थित हुने जनाएको छ । त्यसपछि दोस्रो चरणको आन्दोलनको रूपरेखा तयार गरिने परिषद्ले जानकारी दिएको छ ।