(सिन्धुपाल्चोक) – जिल्ला प्रशासनले अन्य जिल्ला जान जारी गर्ने अत्यावश्यक पास बन्द गर्ने निर्णय गरेको छ । सिन्धुपाल्चोक को सदरमुकाम चौतारामा सोमबार बसेको कोभिड १९ विपद व्यवस्थापन केन्द्रको बैठकले यो निर्णय गरेको हो । अब अत्यावश्यक काममा जिल्ला बाहिर जानुपर्ने भए सम्बन्धित जिल्लाको जिल्ला प्रशासन कार्यालयबाट पास लिनुपर्ने भएको छ ।
अबदेखि जिल्ला प्रशासनले जारी गरेको पास जिल्लाभर मात्रै चल्ने भएको छ । गृह मन्त्रालयबाट प्राप्त एसएमएस मार्फत जिल्ला भन्दा बाहिर लागू हुने गरी त्यस्तो अनुमतिपत्र जारी नगर्न निर्देशन भइ आएकोले अब त्यस्तो अनुमसितपत्र जारी नगर्ने जनाइएको छ ।
यसैबीच सिन्धुपाल्चोक जिल्ला समन्वय समिति प्रमुख कृष्ण गोपाल तामाङ, सहायक प्रमुख जिल्ला अधिकारी बाबुराम खनाल, स्वास्थ्य कार्यालयका प्रमुख दुर्गानाथ चापागाईको टोलिले जिलाका विभिन्न स्थानका क्वारेन्टाइन र आइसोलेसन वार्डको अनुगमन गरेका छन् । अनुगमनको क्रममा सुनकोसी गाउँपालिका वडा नम्बर ६ स्थित महेन्द्रोदय माविमा सञ्चालित ४ बेडको क्वारेन्टाइन र वडा नम्बर ७ स्थित सेतीदेवी माविमा रहेको ७ बेडको क्वारेन्टाइन न्यूनतम मापदण्ड पुरा नभएको पाइएकाले उक्त क्वारेन्टाइनहरुलाई हटाइने भएको छ ।