काठमाडौं – काठमाडौं उपत्यकामा केही दिनयता वायु प्रदूषण निकै बढेको छ । मौसम धुम्मिँदै जाँदा वायु प्रदूषण पनि बढ्न थालेको हो ।
वातावरण विभागले प्रदूषणको समयमा अनावश्यक बाहिर ननिस्कन र घरबाहिर निस्कँदा माक्सको प्रयोग गर्न आग्रह गरेको छ ।
बुधबार बिहान ७ बजे काठमाडौं उपत्यकामा एक्यूआई १७७ रहेको छ । मंगलबार एक्यूआई २०० भन्दा माथि रहेको थियो ।
एक्यूआईको मापदण्डअनुसार ० देखि ५० सम्म राम्रो मानिन्छ भने ५१ देखि १०० सम्म सचेत रहनुपर्ने श्रेणीमा पर्छ । १०० देखि १५० अस्वस्थ मानिन्छ जसले विशेषगरी श्वासप्रश्वास तथा मुटु रोगीलाई असर गर्न सक्छ । १५१ देखि २०० सबैका लागि अस्वस्थ, २०१ देखि ३०० धेरै अस्वस्थ र ३०० भन्दा माथि ‘अत्यन्त खतरनाक’ मानिन्छ ।
हावा चलेमा, पानी परेमा मौसम सफा भएसँगै प्रदूषण कम हुन्छ । तर तत्काल धुम्म भएको मौसम खुल्ने सम्भावना छैन ।