काठमाडौँ । सरकारले आसन्न निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न देशभरका मतदान स्थलहरूलाई सुरक्षा संवेदनशीलताका आधारमा वर्गीकरण गरी एकीकृत सुरक्षा योजना कार्यान्वयनमा ल्याएको छ।
निर्वाचन आयोगका सचिव कृष्णबहादुर राउतका अनुसार गृह मन्त्रालयको समन्वयमा तयार पारिएको यस योजनाले सुरक्षा व्यवस्थालाई थप कडा र प्रभावकारी बनाउने लक्ष्य राखेको छ।
देशभरका कुल १० हजार ९ सय ६७ मतदान स्थलहरूलाई सुरक्षा चुनौतीका आधारमा तीन तहमा विभाजन गरिएको छ।
विगतका निर्वाचनहरूको विश्लेषण र वर्तमान स्थितिको मूल्याङ्कन गर्दै ३ हजार ६ सय ८० वटा स्थललाई अति संवेदनशीलु को सूचीमा राखिएको छ।
त्यसैगरी, ४ हजार ४ सय ४२ वटा मतदान स्थल संवेदनशीलु र २ हजार ८ सय ४५ वटा स्थल ुसामान्यु श्रेणीमा रहेका छन्।
सचिव राउतले यो वर्गीकरण विशुद्ध रूपमा सुरक्षाकर्मी परिचालनलाई व्यवस्थित बनाउन र आवश्यक सुरक्षा प्रबन्ध मिलाउनका लागि मात्र गरिएको स्पष्ट पारेका छन्। निर्वाचनको सुरक्षाका लागि यसपटक पनि तीन घेराको सुरक्षा संयन्त्र परिचालन गरिने भएको छ।
योजनाअनुसार मतदान स्थलको सबैभन्दा भित्री अर्थात् ुकोरु घेरामा नेपाल प्रहरी खटिनेछन्। बीचको दोस्रो घेराको जिम्मा सशस्त्र प्रहरी बललाई दिइएको छ भने सबैभन्दा बाहिरी घेरामा नेपाली सेनाले सुरक्षा पहरा दिनेछ।
आयोगले सुरक्षा संवेदनशीलताका आधारमा कुन ठाउँमा कति जनशक्ति परिचालन गर्ने भन्ने विषयमा सुरक्षा निकायहरूले आफ्नो तयारी पूरा गरिसकेको जानकारी दिएको छ।
निर्वाचनलाई मर्यादित र भयरहित बनाउन राज्यका सबै सुरक्षा अंगहरू एकीकृत रूपमा परिचालन हुने भएकाले ढुक्क भएर मतदान गर्ने वातावरण बन्ने आयोगको विश्वास छ।