काठमाडौँ । प्रतिनिधि सभा सदस्यको निर्वाचनकालागि खटिएका सुरक्षाकर्मि र कर्मचारी गरि अहिलेसम्म १४ जनाको मृत्यु भएको छ । निर्वाचनमा सर्लाहीको पर्सा गाउँपालिका–४, जिगडवास्थित आधारभूत विद्यालय मतदान केन्द्रमा खटिएका रघुनाथ महतो मङ्गलबार अचानक बेहोस भएपछि उपचारको क्रममा मृत्यु भएको बताइएको छ ।
महतो रौतहटको माधव नारायण नगरपालिका–६ का बासिन्दा हुन् । उनी सर्लाहीको बरहथवा नगरपालिका–५ स्थित आधारभूत स्वास्थ्य केन्द्र बरहथवामा सिनियर अहेबको रूपमा कार्यरत थिए । उनको शव प्रादेशिक अस्पतालमा पोस्टमार्टम गरिएको छ । उनको मृत्युको कारण खुलेको छैन ।
कञ्चनपुरमा फागुन १८ मा राति खाना पकाउँदा निर्वाचन प्रहरी मानसिंह राना अचेत भए । पुनर्वास नगरपालिका–९ स्थित सीता बस्तीमा रहेको जीवनशक्ति आधारभूत मतदानस्थलमा खटिएका ३५ वर्षीय मानसिंह रानाको धनगढीस्थित निसर्ग अस्पतालमा मृत्यु भएको जिल्ला प्रहरी कार्यालय कञ्चनपुरका डीएसपी हेमबहादुर शाहीले बताए ।
उनी उच्च रक्तचाप र मधुमेहबाट पीडित थिए । बैतडीमा १ महिनाको अवधिमा ३ जना निर्वाचन प्रहरीको मृत्यु भएको छ । मृत्यु हुनेमा ३८ वर्षीय राजेन्द्र प्रसाद भट्ट, ३८ वर्षीय महादेव वड र ३२ वर्षीय प्रकाश चन्द छन् । दशरथचन्द नगरपालिका–३ घर भएका चन्दको निर्वाचन सुरक्षाको ड्युटी सकेर फर्किने क्रममा भिरबाट लडेर मृत्यु भएको हो ।
अरू दुई जना अचेत भएर ढलेका र उपचारको क्रममा मृत्यु भएको प्रहरीले जनाएको छ । प्रहरकिा अनुसार प्रतिनिधि सभा निर्वाचनको सुरक्षामा खटिएका ११ जना निर्वाचन प्रहरी र दुर्घटनामा परेर १ जना प्रहरी सहायक निरीक्षक (असई) को मृत्यु भएको बताइएको छ ।
फागुन १८ मा रामेछापको रामेछापमा नगरपालिका–२ स्थित सिरुवारीमा ना ७ ख ६७६८ नम्बरको निशान गाडी दुर्घटना हुँदा असई पर्शुराम यादवको मृत्यु भएको थियो । उनको शव पोष्टमार्टमपछि गृहजिल्ला सप्तरीको रुपनी गाउँपालिका–१ मा पठाएको जिल्ला प्रहरी कार्यालय रामेछापले जनाएको छ ।
४० दिन सरकारी सेवा गर्न भनेर भर्ना भएका ११ जना निर्वाचन प्रहरीले निर्वाचन सुरक्षाको दौरानमा ज्यान गुमाएका छन् । रुपन्देहीमा १ जना, बारामा २ जना, महोत्तरीमा १ जना र नवलपरासीमा १ जनाको मृत्यु भएको प्रहरी प्रधान कार्यालयले जनाएको छ ।
फागुन १८ मा मकवानपुरमा गाडीको ठक्करबाट २४ वर्षीय पवन कुमार शाहको मृत्यु भयो । उनी निर्वाचन प्रहरी हुन् । रौतहट घर भएका शाह इलाका प्रहरी कार्यालय पशुपतिनगरमा खटिएका थिए । रामेछापमा गाडी दुर्घटना हुँदा मतदान गराउन जाँदै गरेका मतदान अधिकृत ५७ वर्षीय डोर प्रसाद घिमिरेको मृत्यु भयो ।
उनी मन्थलीबाट मतपत्र लिएर सितलदेवी मावी सिरुवारी र रामेछाप नगरपालिका–३ स्थित वडा कार्यालय भवन जाँदै थिए । मृतक घिमिरे मन्थली नगरपालिका–१ स्थित भैंसेश्वर बस्दै आएका थिए ।