(झापा) – झापाको भद्रपुर विमानस्थल मंगलबारदेखि १० दिनका लागि पूर्णरुपमा बन्द भएको छ । विमानस्थलको धावनमार्ग मर्मतसँगै स्तरोन्नति गर्नुपर्ने भएकाले मंगलबारदेखि आगामी मंसिर ५ गतेसम्मका लागि पूर्णरुपमा बन्द गरेको चन्द्रगढी नागरिक उड्डयन कार्यालयले जनाएको छ ।
चन्द्रगढी नागरिक उड्डयन कार्यालयका अनुसार एक हजार ५०० मिटर लम्बाइ र ३० मिटर चौडाइ रहेको धावनमार्ग जीर्ण बन्दै गएको छ । गत भदौ २० गतेदेखि असोज ४ गतेसम्म दिउँसो २ बजेदेखि विमान बन्द गरेर मर्मत सम्भार गरेपनि प्रभावकारी हुन सकेको थिएन ।
पहिले गरेका मर्मत सम्भारका काम प्रभावकारी नभएकाले अहिले पूर्णरुपमा बन्द गरेर मर्मत सुरु गरेको उड्डयन कार्यालयका प्रमुख पूर्ण चुँडालले जानकारी दिए ।
गौरी–पार्वती–देव एण्ड सायर जेभी काठमाण्डौले धावनमार्ग मर्मत सम्भारसँगै स्तरोन्नतिका लागि १० करोड २३ लाख रुपैयाँमा ठेक्का लिएको कार्यालयले जनाएको छ । नेपाल नागरिक उड्डयन प्राधिकरणसँग लिखितरूपमा अनुमति लिएर विमानस्थल बन्द गराएको उनले बताए ।