(लमजुङ) – लमजुङको सुन्दरबजार नगरपालिकाको वडा नम्बर २ को अध्यक्ष पदका लागि शनिबार भएको मतदानमा नेकपाका उम्मेदवार नवीनकुमार श्रेष्ठ विजयी भएका छन् । शनिबार राति ९ बजे सकिएको मतपरिणाम अनुसार श्रेष्ठले ९ सय ८९ मत ल्याएर विजयी भएका हुन् ।
उनका निकटतम प्रतिद्धन्दी कांग्रेसका प्रकाश सेढाइँले ४ सय ८४ मत पाए । राप्रपाका पवनराज बसौलाले १६ मत, मंगोल नेशनल अर्गनाइजेशनका रामजी दर्जीले १२ मत र स्थानीय चुनावदेखि कांग्रेसबाट छुट्टिएर स्वतन्त्र चुनाव लड्दै आएको स्वतन्त्र समूहका कृष्णबहादुर केसीले ८ मत पाएका छन् ।
मुख्य निर्वाचन अधिकृत हरिश्चन्द्र ढुंगानाका अनुसार १२ मत बदर भएको छ । स्थानीय तह चुनावमा वडा अध्यक्षमा निर्वाचित तत्कालीन एमालेका लोकराज पाण्डे जिल्ला समन्वय समितिको प्रमुख निर्वाचित भएपछि उक्त वडामा उपनिर्वाचन भएको हो ।