काठमाडौं – पूर्वी नवलपरासीको मध्यविन्दु नगरपालिका-११ मा गए राति बस दुर्घटना हुदाँ २३ जना घाइते भएका छन्।
पूर्व-पश्चिम राजमार्गमा काठमाडौँबाट धनगढीतर्फ जाँदै गरेको ना ७ ख ४१५ नंको बस ‘ब्रेकफेल’ भई सडकको दाहिनेतर्फ पल्टिँदा बसमा सवार ५० मध्ये २३ जना घाइते भएका जिल्ला प्रहरी कार्यालय पूर्वी नवलपरासीका सूचना अधिकारी प्रहरी उपरीक्षक सन्तोष पाठकले बताए।
उनका अनुसार घाइतेलाई उपचारका लागि मध्यविन्दु जिल्ला अस्पताल लगिएकोमा १८ जना सामान्य उपचारपछि डिस्चार्ज भएका छन्। बाँकीलाई थप उपचारका लागि पुरानो मेडिकल कलेज भरतपुर सिफारिस गरिएको र बस चालक प्रहरी नियन्त्रणमा रहेको प्रहरी उपरीक्षक पाठकले बताए।
उनका अनुसार घाइते सुर्खेत वीरेन्द्रनगर-१२ का प्रकाश सुनार, कैलालीको कैलाली गाउँपालिका-९ का श्याम चौधरी, कन्चनपुर बेलौरी नगरपालिका-२ का वीरेन्द्र नेपाली, कैलाली धनगढी उपमहानगरपालिका- १३ का सन्तोष भट्ट र निर्मला जोशीलाई थप उपचारका लागि पुरानो मेडिकल कलेज पठाइएको हो।