काठमाडौं – भारतको ग्रेटर नोएडामा सम्पन्न म्याट्रिक्स फाइट नाइट (MFN) १७ मा नेपालका रवीन्द्र ढाटले बान्टमवेट च्याम्पियनसिप जितेका छन् । ‘बझाङको बाघ’ उपनामले चिनिने ढाटले भारतका ‘दि इन्डियन राइनो’ चुनरेङ कोरेनलाई पराजित गर्दै उपाधि जितेका हुन् ।
यो जितसँगै रवीन्द्र ढाट एमएफएनको बान्टमवेट च्याम्पियन बन्ने पहिलो नेपाली खेलाडी बनेका छन्। उनको यो उपलब्धिले नेपाली एमएमएको इतिहासमा नयाँ अध्याय थपेको छ।
२६ वर्षीय ढाट बझाङ जिल्लाका हुन्। कठिन परिवेशमा हुर्केका उनी कक्षा १० सम्मको पढाइ सकेपछि रोजगारीका लागि भारत गएका हुन् । एमएमए खेलप्रतिको सपनाका कारण उनले नेपालका ‘लक एन रोल एमएमए’ क्लब र बालीस्थित ‘सोमा फाइट क्लब’ मा प्रशिक्षण लिँदै आफ्नो सीपलाई निखारे।
ढाटको प्रोफेशनल रेकर्ड अहिले ८–१ रहेको छ, जसमा ६ नोकआउट छन्। उनका प्रतिस्पर्धी कोरेन भने पाँच लडाइँ लगातार जितेर ७–१ को रेकर्डका साथ रिङमा उत्रिएका थिए। १३५ पाउन्डको यो उपाधिका लागि दुवै खेलाडीबीच तीव्र प्रतिस्पर्धा भयो तर ढाटको सटीक प्रहार र आक्रामक दबाबले अन्ततः कोरेन निस्तेज भए। निर्णायक क्षणमा रेफ्रीले फाइट रोके र ढाटलाई नोकआउटमार्फत विजेता घोषणा गरे।
ढाटले नेपाल वारियर्स च्याम्पियनसिप (NWC) जस्ता प्लेटफर्ममार्फत युवाहरूलाई एमएमएतर्फ आकर्षित गरिरहेका छन्।