काठमाडौं – पूर्वराष्ट्रपति विद्यादेवी भण्डारीसँग मनमुटाव बढ्दै जाँदा नेकपा एमालेका अध्यक्ष केपी शर्मा ओलीले ३१ वर्ष पुरानो मदन–आश्रित स्मृति प्रतिष्ठानलाई सक्रिय पारेका छन्।
प्रतिष्ठानले आगामी दिनमा मदन भण्डारी फाउन्डेसनलाई टक्कर दिन लामो समय निष्क्रिय रहेको प्रतिष्ठानलाई सक्रिय बनाइएको एमालेका नेताहरू बताउँछन्।
तत्कालीन महासचिव मदन भण्डारी र संगठन विभाग प्रमुख जीवराज आश्रितको मृत्यु भएपछि २०५० जेठ ९ गते मदन–आश्रित स्मृति प्रतिष्ठान बनेको थियो। लामो समय निष्क्रिय रहेको प्रतिष्ठानलाई साउन तेस्रो हप्तादेखि अध्यक्ष ओलीका विश्वासपात्र प्रदिप ज्ञवालीको कमान्डमा ल्याइएको छ।
साउन २३ गते भएको अधिवेशनबाट एमाले उपमहासचिव प्रदीप ज्ञवाली प्रतिष्ठानको अध्यक्ष चुनिएका हुन्। अध्यक्ष ज्ञवालीले एमाले अध्यक्ष केपी शर्मा ओलीबाट उनले सोमबार एमाले मुख्यालय च्यासलमा शपथ लिएका छन्।
सदस्य सचिव मधु तिमल्सिनाका अनुसार प्रतिष्ठानले अब राजनीतिक वैचारिक क्षेत्रमा काम गर्नेछ।
‘केपी ओलीलाई एमालेको अध्यक्ष मदन भण्डारी फाउन्डेसनले नै बनाएको हो। उहाँलाई फाउन्डेसनले केसम्म गर्न सक्छ र तागत राख्छ भन्ने कुरा थाहा छ,’ एक नेताले भने, ‘त्यसबाट कसरी गुटबन्दी हुन्छ भन्ने कुरा थाहा छ। त्यसबाट हिजो झलनाथ खनाल र माधवकुमार नेपाललाई जुन खालको अप्ठेरो पारेको थियो, त्यो ओलीले प्रष्ट देख्नुभएको छ।’
२०५० जेठ ३ गते चितवनको दासढुङ्गामा रहस्यमय जीप दुर्घटनामा भण्डारी र आश्रितको मृत्युसँगै एमालेले जबजलाई केन्द्रमा राखेर राजनीति गर्दै आएको छ।
जबजलाई पार्टीको निर्देशक सिद्धान्त मान्दै एमालेले यही विचारलाई अघि बढाउने लक्ष्यसहित २०५६ सालमा मदन भण्डारी अध्ययन अनुसन्धान केन्द्र स्थापना गरेको थियो। त्यसको अध्यक्ष तत्कालीन एमालेकी केन्द्रीय सदस्य एवं मदनकी श्रीमती विद्यादेवी भण्डारी बनिन्।
त्यतिबेला एमालेका स्थायी कमिटी सदस्य रहेका केपी शर्मा ओली केन्द्रको संरक्षक थिए। २०५४ सालमा भएको महाधिवेशनमा कमजोर बनेपछि ओलीले यही मदन भण्डारी अनुसन्धान केन्द्रमार्फत् गतिविधि गरेका थीए।
एमालेका उपाध्यक्ष युवराज ज्ञवालीका अनुसार यो संस्था विद्या भण्डारी र केपी शर्मा ओली दुईजनाको क्रियाशीलतामा अलग संस्थाका रूपमा स्थापना गरिएको हो। २०६१ साल भदौमा यसैलाई मदन भण्डारी फाउन्डेसनका रूपमा दर्ता गरियो।
त्यसयतादेखि २०७२ कात्तिकसम्म फाउन्डेसनको अध्यक्षमा विद्यादेवी भण्डारी रहिन्। एमालेको उपाध्यक्ष रहेकी उनले राष्ट्रपति बनेपछि उपाध्यक्ष र फाउन्डेसनको अध्यक्ष दुवैबाट राजीनामा दिइन्। अहिले उनकै छोरी उषाकिरण भण्डारी फाउन्डेसनको अध्यक्ष छिन्।
अहिले देशभरका ५० बढी जिल्लामा फाउन्डेसनको शाखा कार्यालय छ। फाउन्डेसनमार्फत् एमालेको राजनीतिक गतिविधि हुने गरेको छ।