काठमाडौं – पूर्वराष्ट्रपति विद्यादेवी भण्डारी नेकपा एमाले मोरङको पार्टी कार्यालयमा गएकी छन् ।
विराटनगरबाट प्रकाशित हुने उद्घोष दैनिकको २१औं वार्षिक उत्सव कार्यक्रमका निम्ति आएकी भण्डारी एमाले मोरङको कार्यालय पनि गएकी हुन् ।
पार्टी कार्यालयमा जिल्ला अध्यक्ष अजम्बर राई र सचिव सोम थापा सहितका नेताहरुले स्वागत गरेका थिए । पार्टी कार्यालयमा भेला भएका कार्यकर्ताहरुलाई पूर्वराष्ट्रपति भण्डारीले सम्बोधन पनि गरिन् ।
१० वर्षपछि भण्डारी पार्टी कार्यालय आउने सूचना पाएका कार्यकर्ता स्वागतका निम्ति तयार पनि थिए । तर प्रदेश अध्यक्ष घनश्याम खतिवडाले पार्टी कार्यालयमा पूर्वराष्ट्रपति भण्डारीका लागि कुनै कार्यक्रम नराख्न जिल्ला सचिव सोमराज थापालाई निर्देशन दिएका थिए ।
एमाले विराटनगर महानगरपालिका इञ्चार्ज पर्शुराम बस्नेतले पार्टी कार्यालयमा कुनै कार्यक्रम नभएको भन्दै कार्याकर्तालाई नजान उर्दी जारी गरे । यसरी संस्थापन पक्षले रोक्ने प्रयास गरेपनि पूर्वराष्ट्रपति विद्यादेवी भण्डारी दिउँसो १ बजतिर पार्टी कार्यालय पुगिन् ।
पार्टी कार्यालयमा भण्डारीलाई जिल्ला र विराटनगर महानगरपालिकाका नगर नेतृत्वले स्वागत गर्यो । जिल्ला र नगरको नेतृत्व भण्डारी पक्षकै छ । विद्या भण्डारीको स्वागत तथा भेटघाटमा अध्यक्ष केपी शर्मा ओली पक्षका नेता कार्यकर्ता भने गएनन् ।