काठमाडौं – नेकपा माओवादी केन्द्रका अध्यक्ष पुष्पकमल दाहाल प्रचण्डले सहकारी ठगीका अभियुक्त तथा राष्ट्रिय स्वतन्त्र पार्टीका सभापति रवि लामिछानेसँग भेट गरेका छन्।
प्रचण्डले ललितपुरस्थित नक्खु कारागार पुगेर लामिछानेलाई भेटेका हुन्।
लामिछानेलाई भेटेर निस्किएपछि उनले लामिछाने दुब्लाएको बताए। उनले आफू अभिभावकको हिसाबले उनलाई भेट्न पुगेको पनि बताए।
‘भरखरै रवि लामिछानेसँग भेट गरेँ, मेरो क्याबिनेटमा गृहमन्त्री पनि हो उहाँ,’ प्रचण्डले भने, ‘अभिभावकको हिसाबले उहाँको अवस्था बुझ्नु स्वाभाविक नै हो। भैरहवा हुँदा नै जान खोजेको, मिलेन। उहाँको भैरहवाको बसाइँको स्थिति जटिल नै रहेछ। दुब्लाउनुभएछ।’
उनले अगाडी थपे ‘यहाँ बसाइँ राम्रो भएको, खानपिन पनि राम्रो भएको भन्नुभयो। भैरहवाको तुलनामा धेरै राम्रो छ भनेर यहाँको व्यवस्थापनको प्रशंसा गर्नुभयो।’
‘कांग्रेस–एमालेले रविमाथि जसरी व्यवहार गरेका छन्, त्यसले उहाँ र उहाँको पार्टीलाई देशभर फाइदा पुगेको रहेछ भन्ने उहाँको बुझाइ रहेछ,’ प्रचण्डले भने । प्रचण्डले आफू प्रधानमन्त्री हुँदा लामिछाने दुईपटक गृहमन्त्री बनेको स्मरण गर्दै आजको भेटलाई ‘अभिभावकत्वको आधार’का रूपमा लिएको बताए ।