काठमाडौं – उपल्लो मुस्ताङको लोमान्थाङ गाउँपालिकामा धार्मिक तथा सांस्कृतिक ‘यार्तुङ’ पर्वमा आयोजित एक लाख नगद पुरस्कारको कदम घोडा दौड प्रतियोगिताको उपाधी ढुक्के विष्टले जितेका छन् ।
लोमान्थाङ युवा क्लवको आयोजना तथा अन्नपूर्ण संरक्षण क्षेत्र आयोजना ईलाका संरक्षण कार्यालय लोमान्थाङको आर्थिक सहयोगमा आयोजित मेलामा कदमतर्फ दोस्रो छेटुप गुरूङ, तेस्रो निमा वाङ्दी गुरूङले क्रमशः नगद ५० हजार रुपियाँ र २५ हजार प्रमाणपत्र प्राप्त गरेको एक्याप लोमान्थाङका प्रमुख उमेश पौडेलले बताए ।
प्रतियोगितामा लामो दूरीको घोडा दौड प्रतियोगितामा डब्ला गुरूङ प्रथम, ल्याहाक्पा गुरूङ द्वितीय र ढुक्के विष्ट तृतीय भएका छन् । प्रतियोगिताका विजेतालाई क्रमशः ३० हजार रुपियाँ, २० हजार रुपियाँ र १० हजार रुपियाँ प्रदान गरिएको छ ।
कदम घोडा दौड प्रतियोगितामा १२ र भक्का घोडा दौड प्रतियोगितामा ६ जना प्रतियोगिको सहभागिता रहेको थियो । ‘यार्तुङ’ पर्वको सबैभन्दा मुख्य आर्कषण घोडा दौड प्रतियोगिता रहेको छ । प्रतियोगितामा विजेतालाई मुस्ताङका सांस्कृतिक राजपरिवारका सदस्य लोमान्थाङ गाउँपालिका अध्यक्ष टसी न्हर्वु गुरुङ, उपाध्यक्ष छयुमी बिष्ट गुरुङलगायतले सम्मान गरेका थिए ।
यहाँका गुरुङ, बिष्ट र लोवा समुदायले आत्मबल, उर्जा र कठिन परिस्थितिहरूसँग लड्ने क्षमतालाई बलियो बनाउन पर्व मनाउने गर्दछन् । मुस्ताङको वारागुङ मुक्तिक्षेत्र गाउँपालिका, लोघेकर दामोदरकुण्ड र लोमान्थाङ गाउँपालिकामा मनाइने चाडपर्वमा घोडालाई शक्ति र दृढताको प्रतीक भएकाले प्रतियोगितामा आर्कषक पुरस्कार राखिन्छ ।
आफ्नो संस्कार धान्नका लागि मात्रै मनाउने गरिएको यार्तुङ पर्व पछिल्लो समयमा आन्तरिक तथा बाह्य पर्यटन प्रवर्धनमा समेत सघाइरहेको आयोजक लोमान्थाङ युवा क्लवले जनाएको छ । यारको अर्थ बर्खा र तुङको अर्थ हिउँद भन्ने बुझिन्छ । बर्खायामपछि हिउँदयामको सुरुवाती झल्को दिने यार्तुङको सांस्कृतिक विशेषता हो ।
बर्सेनि खेतीपातीको कामकाज सकेर हिउँदयामको सुरुआती महिनामा मनाइने यो पर्वलाई यार्तुङ भन्ने गरिएको हो । तीन दिनसम्म मनाइने पर्वको अवसरमा प्रतियोगिता बाहेक स्थानीयले दरबारमा गएर खादा चढाएर आर्शीवाद लिने प्रचलन रहेको छ । पर्व अवधिभर शुभकामना आदानप्रदान, परम्परागत भेषभूषामा सजिएर विभिन्न कार्यक्रमका साथै लामाले धार्मिक विधि अनुसार विविध कार्य गर्ने गरिन्छ । गोरखापत्र