काठमाडौं – गण्डकी प्रदेशसभा पूर्व भौतिक मन्त्रीसमेत रहेका माओवादी सांसद रेशमबहादुर जुग्जालीले रोष्ट्रममै प्रदेशको बजेट पुस्तिका च्यातेका छन्।
गण्डकी प्रदेश सरकारले आर्थिक वर्ष २०८२/०८३ का लागि ल्याएको बजेट असमान ढंगले ल्याएको आरोप लगाउँदै जुग्जालीले बजेट पुस्तिका च्यातेका हुन्। उनी २०७९ सालको चुनावमा म्याग्दी (ख) बाट निर्वाचित भएका थिए।
भौतिक पूर्वाधार विकास मन्त्रालयको वार्षिक विकास कार्यक्रममाथि धारणा राख्न रोष्ट्रममा पुगेका उनले बजेटमा म्याग्दीलगायतका जिल्लामाथि अन्याय गरेको टिप्पणी गरे। मुख्यमन्त्री र अर्थमन्त्रीले आ–आफ्नो जिल्लामा मात्रै बजेट खन्याएको उनको आरोप छ।
‘बजेटमा लगातार २ वर्षसम्म म्याग्दीलाई अन्याय भएको छ,’ उनले भने, ‘अहिलेको बजेट म्याग्दीलाई कुनै अर्थ नभएको हुँदा माननीय सभामुखको अनुमतिले च्यात्न चाहन्छु, धन्यवाद।’
म्याग्दीमा साढे ३ करोडको मात्र नयाँ योजना छानिएको तैपनि कांग्रेस र एमालेले छानेको योजना परेको उनले बताए। उनले म्याग्दीको समस्या र अवस्था अर्थमन्त्री र भौतिक मन्त्रीलाई थाहा नभएकाले बजेट नछुट्याएको हुनसक्ने भन्दै दुवै जना मन्त्रीलाई म्याग्दी लगेर घुमाउनेसमेत बताए।
जुग्जालीले अहिलेको बजेट सगरमाथा हिँड्न खोजेको तर हिन्दमहासागरतिर पुगेको टिप्पणी गरे। गण्डकीको बजेटमा देवीदेवताको मन्दिर र धामका लागि धेरै बजेट छुट्याएको भन्दै उनले भने, ‘बजेटबाट सबैभन्दा बढी देवीदेवता खुसी भएको हुन सक्छ।’
सरकारले आगामी आव २०८२/०८३ का लागि ३१ अर्ब ९७ करोडको बजेट ल्याएको छ। जसमा भौतिक पूर्वाधार तथा यातायात व्यवस्था मन्त्रालयलाई पुँजीगततर्फ ११ अर्ब ४८ करोड ३५ लाख रुपैयाँ छुट्याइएको छ।