काठमाडौं – नेकपा एमालेका केन्द्रीय सदस्य ऐन महरलाई सरकारी वकिल कार्यालय काठमाडौंले हाजिर जमानीमा छाड्ने निर्णय गरेको छ। सोहीअनुसारको आदेश साइबर ब्युरोलाई गरिसकेको छ।
जिल्ला सरकारी वकिल कार्यालयका प्रमुख सहन्यायाधिवक्ता रामहरि काफ्लेले महरलाई हाजिर जमानीमा छाड्ने निर्णय भएको बताए।
पक्राउलगत्तै उनलाई म्याद थपका लागि सरकारी वकिल कार्यालय लगिएको थियो। वकिल कार्यालयले उनलाई हाजिर जमानीमा छाड्ने निर्णय गरेको हो।
२९ वर्षीया एक युवतीले महरले सामाजिक सञ्जालमार्फत चरित्रहत्या गरेको आरोप लगाउँद हुलाकमार्फत ब्युरोमा जाहेरी दिएकी थिइन् । जाहेरी दर्ता भएपछि जिल्ला अदालत काठमाडौँले ९ भदौमा महरविरुद्ध पक्राउ पुर्जी जारी गरेको थियो ।
विद्युतीय कारोबार ऐन, २०६३ को दफा ४७ अनुसार विद्युतीय सञ्चार माध्यमबाट कसैप्रति घृणा वा दोष फैलाउने, महिलालाई जिस्काउने, हैरानी गर्ने वा अपमान गर्ने कार्य गरेमा एक लाख रुपैयाँसम्म जरिवाना वा पाँच वर्षसम्म कैद वा दुवै सजाय हुन सक्ने व्यवस्था छ ।