(काठमाडौं) – प्रदेश प्रमुखहरु बर्खास्त गर्ने सरकारको निर्णय सहमतिको राजनीतिलाई थप बिथोल्ने प्रयत्न भएको निष्कर्ष प्रमुख प्रतिपक्षी दल नेपाली कांग्रेसले निकालेको छ ।
काठमाडौंको बुढानिलकण्ठस्थित सभापति शेरबहादुर देउवाको निवासमा मंगलबार बसेको कांग्रेस पदाधिकारीहरुको बैठकले संस्थापक प्रदेश प्रमुखहरुलाई समयावधिसम्म कार्य गर्न नदिएर हटाउनु अशोभनीय भएको ठहर गरेको छ ।
कांग्रेसका मुख्य सचिव कृष्ण प्रसाद पौडेलद्वारा जारी विज्ञप्तिमा भनिएको छ, ‘बर्खास्तीले सहमतिको राजनीतिलाई थप बिथोल्ने प्रयत्न गरेको छ ।’
प्रदेश प्रमुख बर्खास्त गर्ने निर्णयलाई अतार्किक एवं कम्युनिष्ट सत्ताको असफल दिशामा जान खोज्ने संकेत प्रवाह गर्न खोजिएको घटनाको रुपमा लिएको कांग्रेसले जनाएको छ ।
संघीयता कार्यान्वयन सम्बन्धी अनेक कार्यभार बाँकी छँदाछँदै यो विषयमा प्रवेश गर्नु अत्यन्त गलत भएको कांग्रेसले बताएको छ ।
‘यो निर्णय राजनीतिक दृष्टिले समेत पूर्वाग्रहपूर्ण छ’ कांग्रेसले जारी गरेको विज्ञप्तिमा भनिएको छ, ‘उपनिर्वाचनको समयमै प्रदेश प्रमुखहरुको बर्खास्ती हुनु निर्वाचनलाई प्रभावित पार्ने षडयन्त्रको रुपमा आएको र नैतिक दृष्टिले निर्वाचन आचार संहिता विपरीत हो ।’
आगामी मंसिर १४ गते हुन लागेको उपनिर्वाचनको समयमै प्रदेश प्रमुखहरुको बर्खास्ती हुनु निर्वाचनलाई प्रभावित पार्ने षडयन्त्रको रुपमा आएको र नैतिक दृष्टिले निर्वाचन आचार संहिता विपरीत समेत रहेको ठहर बैठकले गरेको कांग्रेसले जनाएको छ ।