सिन्धुपाल्चोक – सिन्धुपाल्चोकमा यात्रु बस दुर्घटना हुँदा ८ जनाको मृत्यु भएको छ । ४० जना भन्दा बढी घाइते भएका छन् । इन्द्रावती गाउँपालिका १० भोटसिपाबाट काठमाडौं आउँदै गरेको बा २ ख २७१५ नम्बरको बस तिर्खुमोडमा दुर्घटना हुँदा ८ जनाको मृत्यु भएको हो ।
घटनास्थलमै ६ जनाको र २ को अस्पताल लैजाँदै गर्दा मृत्यु भएको हो । मृतकको सनाखत हुन बाँकी रहेको प्रहरीले जनाएको छ । बिहान ८ बजे भोटसिपा गाउँबाट हिँडेको बस १० बजेतिर सडकबाटै तल खसेर क्षतिग्रस्त भएको थियो । उद्धार कार्य चलिरहेको प्रहरीले जनाएको छ ।
प्रहरीले खबर पाएलगत्तै घटनास्थलमा पुगेर स्थानीयसँगै उद्धारकार्यमा जुटेको थियो । गाडीमा झण्डै ७० जना सवार रहेको अनुमान गरिएको छ ।
जिल्ला प्रहरी कार्यालयका प्रहरी नायव उपरीक्षक माधवप्रसाद काफ्लेलेका अनुसार कच्ची सडक र क्षमताभन्दा बढी यात्रु चढाएका कारणले दुर्घटना भएको हो ।
घटनाबारे थप विवरण आउन बाँकी छ ।