काठमाडौं – अवैध रुपमा ल्याउँदै गरेको सुनसहित काठमाडौंबाट दुई जना पक्राउ परेका छन् । त्रिभुवन अन्तर्राष्ट्रिय विमानस्थलबाट अवैद्य रुपमा सुन ल्याउँदै गरेको अवस्थामा महानगरीय प्रहरी वृत्त कीर्तिपुरबाट सादा पोशाकमा खटिएको प्रहरी टोलीले चावहिलबाट उनीहरुलाई पक्राउ गरेको हो ।
पक्राउ पर्नेमा नवलपरासीका ४० वर्षीय धुब्रबहादुर दर्लामी र बाग्लुङका २५ वर्षीय नीरबहादुर परियार छन् । त्रिभुवन विमानस्थलबाट पास भएर चावहिल ल्याइसकेको अवस्थामा उनीहरु पक्राउ परेका हुन् ।
वृत्तका प्रमुख, प्रहरी नायब उपरीक्षक छेदुलाल कामतीले विमानस्थलबाट पास भएर चावहिल ल्याइसकेको अवस्थामा उनीहरुलाई पक्राउ गरिएको बताए ।
उनीहको साथबाट १६ तोला १४ लाल सुन बरामद भएको प्रहरीले जनाएको छ । उनीहरुबाट बरामद भएको सो परिमाणको सुनको बजार मूल्य १२ लाख बराबर रहेको प्रहरीले जनाएको छ ।
पक्राउ परेका दुवैलाई थप अनुसन्धान र कारवाहीका लागि राजश्व कार्यालय पठाएको वृत्तले जनाएको छ ।