काठमाडौं – नेकपा (माओवादी) का महासचिव नेत्रविक्रम चन्द विप्लवले तत्काल सर्वपक्षीय सरकार बन्नुपर्ने प्रस्ताव गरेका छन् ।
शनिबार भक्तपुरको सल्लाघारीस्थित तीनकुनेमा आयोजित नेकपा एमालेको ११ औं महाधिवेशनको उद्घाटन समारोहमा बोल्दै महासचिव विप्लवले सर्वपक्षीय अन्तरिम सरकार बनाएर मात्रै निर्वाचनमा जान उपयुक्त हुने बताए ।
‘यो देशलाई यहाँसम्म ल्याएको राजनीतिक शक्तिहरुले नै हो । योगदान गरेको पनि राजनीतिक शक्तिहरुले नै भएको हुनाले सर्वपक्षीय सरकार, अन्तरिम सरकार बनाएर सहज ढंगले संविधानलाई पुनर्लेखन गर्नुपर्यो भने पनि गरेर नेपालका सबै श्रमिक, जाति, वर्ग, क्षेत्र, उत्पीडनमा परेका सबै नयाँ पुस्ता, युवा जेनजी देश, विदेशमा रहेका नेपाली नागरिकहरुको चाहनालाई सम्बोधन गरेरमात्रै चुनावतिर जान आवश्यक छ,’ उनले भने ।
वर्तमान सरकार अँध्यारो कुनाबाट बनेको अवैध भन्दै राजनीतिक दलहरुले नै सरकारको नेतृत्व गरेर मात्रै निर्वाचन गराउन सकिने तर्क समेत गरे ।
‘आज देशमा अनौठो प्रकारले सरकार बनेको छ । न यो आन्दोलनको मर्मअनुसार छ । न संवैधानिक प्रक्रिया अनुसारको छ । अध्यारो कुनाबाट खडा गरिएको यो अवैध सरकारलाई हाम्रो समर्थन छैन र हुन सक्दैन । त्यसैले हामीले के भनेका छौ भने–देशलाई एउटा निकास चाहिएको छ । त्यो निकासको निम्ति राजनीतिक शक्तिहरुले नै नेतृत्व गर्नुपर्दछ,’ उनले भने ।
शुभकामना दिँदै उनले भने–‘हामीले बुझेका छौं, प्रष्ट छौं एमालेलाई भयंकर ठूलो हमला भएको छ, एमालेले राष्ट्रिय स्वाधिनतामा लिएकौ अडानै कारण यो हमला भएको हो भन्ने कुरामा कोही अलमलिनुपर्दैन, होलान् धेरै कमजोरी एमालेभित्र तर त्यो विषय फरक हो, अहिलेको हमला साम्रराज्यवादीको योजनामा भएको हो । यो एमालेले मात्रै होइन सबैले बुझ्न जरुरी छ ।’
नेता विप्लवले एमालेसँग आन्दोलनमा सहकार्य गर्न, स्वाधिनताका लागि साथ दिन तयार रहेको बताउँदै महाधिवेशनले कम्युनिष्ट आन्दोलनको एकताको प्रस्ताव हुनुपर्ने र ००६ सालको जस्तै कम्युनिष्ट पार्टी बनाउने संकल्प महाधिवेशनले संकल्प गरोस् भन्ने शुभकामना दिए ।