काठमाडौं – कांग्रेस सभापति शेरबहादुर देउवा र राष्ट्रिय प्रजातन्त्र पार्टी(राप्रपा) का अध्यक्ष राजेन्द्र लिङ्देनबीच भेटवार्ता भएको छ । मंगलबार दिउँसो बुढानीलकण्ठस्थित देउवा निवासमा दुई नेताबीच भेटवार्ता भएको हो ।
यही पुस २७ गते राप्रपाले आयोजना गर्ने पृथ्वी जयन्ती विशेष कार्यक्रमको निम्तो दिन आफू बुढानीलकण्ठ गएको अध्यक्ष लिङ्देनले बताए ।
समसामयिक राजनीतिक विषय र संविधान संशोधनका विषयमा पनि कुराकानी भयो कि भन्ने प्रश्नमा लिङ्देनले भने, ‘दुई जना पार्टीका प्रमुख नेताबीच विभिन्न विषयमा छलफल त हुने नै भयो । पृथ्वी जयन्तीको निम्तो दिन गएको हुँ । त्यस्तो समाचार बन्ने खालको केही छैन ।’
पृथ्वी जयन्तीका अवसरमा राप्रपाले विभिन्न कार्यक्रमका साथे प्रत्येक वर्ष चियापान गर्दै आएको छ । उक्त दिन राप्रपाले प्रमुख दलका शीर्ष नेताहरूलाई एउटै मञ्चमा समेत जुटाउँदै आएको छ ।