काठमाडौँ – आगामी जेठ १० गतेबाट प्रदर्शनमा आउने तयारीमा रहेको जातीय विभेदविरुद्ध संघर्षको कथामा निर्माण भएको चलचित्र ‘पूजार सार्की’ प्रति राष्ट्रिय दलित आयोगले चासो देखाएको छ ।
यसै साता ललितपुरको कुपण्डलोस्थित आयोगको कार्यालयमा फिल्मका टिमसँग आयोगका अध्यक्षदेखि सदस्यसम्मले भेट गर्दै फिल्म बारे जानकारी लिएका हुन् ।
अभिनेत्रीद्वय अञ्जना बराइली र परीक्षा लिम्बू र लेखक विकास सुवेदी सहभागी कार्यक्रममा आयोगका व्यक्तिहरूलाई फिल्मको विषयमा लेखकले बताएका थिए ।
‘मैले आफ्नो गाउँ ठाउँमा देखेको घटनामा फिल्म लेखेको हो र त्यही जानकारी आयोगका साथीहरूलाई गराए’, सुवेदीले भने । कमर्सियल कलाकारहरू र प्रस्तुतिसहित फिल्मबाट जात भन्ने चीज नै मानवीय दृष्टिमा स्वीकार्य हुँदैन भन्ने कुरा स्थापित गर्न खोजिएको समेत जानकार दिएको उनको भनाई रहेको छ ।
अभिनेत्री अञ्जना बराइलीले आफू पनि दलित समुदायबाट प्रतिनिधित्व गर्ने भएकाले बच्चैदेखि विभेद देखेको कार्यक्रममा स्मरण गरेकी थिइन् ।
अभिनेत्री परीक्षालाई भने सुरुमा यस्तो कथामा अझै पनि फिल्म बनाउन जरुरी छ भन्ने लागेको बताइन् । उनले भनिन्, ‘जुन समुदाय र स्थानमा म हुर्किएँ, त्यहाँबाट हेर्दा अझै पनि यस्तो कथामा फिल्म बनाउन जरुरी छ र ? भन्ने जस्तो भयो ।’ उनले आफूमा जातीय विभेद सकिएको बुझाई रहेको सुनाइन् ।
भेटमा दलित आयोगका अध्यक्ष देवराज विश्वकर्माले जातीय विभेद अन्त्य गर्ने उद्देश्यले ‘पूजार सार्की’ निर्माण भएकोमा खुसी व्यक्त गर्दै सहयोग गर्ने प्रतिबद्धता जनाए ।
दलित आयोगका सदस्यहरू मिना देवी सोव, टुन्जे कामी, मेहले पार्की र सुन्दर पुर्कुटीले पनि फिल्मले उठाएको विषयको प्रशंसा गरेको लेखक विकाश सुवेदीको भनाई छ ।
फिल्ममा आर्यन सिग्देल, प्रदीप खड्का र पल शाहको अभिनय देख्न सकिन्छ ।