काठमाडौं – त्रिभुवन विश्वविद्यालयको उपकुलपति प्राडा दीपक आर्यालको कार्यालयको मुल ढोकामा अनसन बसेका अनेरास्ववियु क्रान्तिकारीका विद्यार्थीले सोमबार दिउँसो रजिस्ट्रार केदार रिजालमाथि हातपात गरेका छन् ।
गत असोज १ गतेबाट स्थापना भएको चार विभागमा अध्ययनरत विद्यार्थीको शुल्क अन्य विभागसरह हुनुपर्ने माग राख्दै उपकुलपति कार्यालयमा धर्ना दिएका विद्यार्थीहरूले रजिस्टार रिजाललाई टेबल क्यालेन्डर प्रहार गर्नुका साथै पानीको गिलासले समेत प्रहार गरेका छन् ।
रिले अनसन बसेका विद्यार्थीले उपकुलपति प्राडा अर्याल र रेक्टर प्राडा खड्ग केसी कार्यालयमा नभएको समयमा रजिस्ट्रार रिजालमाथि अभद्र व्यवहार गरेका हुन् । रजिस्ट्रार रिजालले माग पूरा गर्ने विषयमा अनेरास्ववियुसँग छलफल गरिरहेको अवस्थामा क्रान्तिकारीका विद्यार्थीहरूले क्रान्तिकारीसँग वार्ता नगरी सरकारआबद्ध अनेरास्ववियुका विद्यार्थी नेतासँग मात्र वार्ता गरेको आरोप लगाउँदै तोडफोड गरेका हुन् ।
तोडफोडबाट रजिस्ट्रारलाई सामान्य चोट लागेको छ भने रजिस्ट्रार कार्यालय क्षतिग्रस्त भएको छ । यसैबीच त्रिविका पदाधिकारीको कार्यकक्षमा तोडफोड गर्न पुगेका विद्यार्थी र प्रहरीबीच पनि केहीबेर झडप भएको थियो । झडपका क्रममका केही विद्यार्थी र प्रहरी घाइते भएका छन् ।
यसैबीच त्रिभुवन विश्वविद्यालय (त्रिवि) कीर्तिपुरमा विद्यार्थी संगठनले गरेको रिले अनशनमा प्रहरीले हस्तक्षेप गरेको छ । शुल्क वृद्धिको विरोधमा आन्दोलनरत नेकपा (माओवादी केन्द्र) निकट अखिल (क्रान्तिकारी) को अनशनमा प्रहरीले सोमबार हस्तक्षेप गर्दा झडपको स्थिति सिर्जना भएको हो ।
अखिल क्रान्तिकारीका केन्द्रीय उपाध्यक्ष अभिमन्यु यादवले दिएको जानकारीअनुसार प्रहरीले संगठनका उपाध्यक्ष, महासचिव, केन्द्रीय सदस्यलगायत करिब १६ जनालाई पक्राउ गरेको छ ।