काठमाडौं – नव नियुक्त प्रधानमन्त्री सुशिला कार्कीको व्यक्तिगत सुरक्षा अधिकृत (पिएसओ)मा डीएसपी निशान थापालाई खटाइएको छ । आईजीपी चन्द्रकुवेर खापुङले कार्कीको सुरक्षामा थापालाई पठाउने निर्णय गरेका हुन् ।
नव नियुक्त प्रधानमन्त्री बालुवाटारमा नै बस्ने भएकी छन् । जेनजी प्रदर्शनको क्रममा प्रधानमन्त्रीको निवासमा आगजनी भएपनि मुख्य निवासमा आगजनी नभएको हुनाले त्यहि बस्न लागिएको प्रधानमन्त्री तथा मन्त्रीपरिषद् कार्यालयका एकजना अधिकृतले बताए ।
जेनजी प्रदर्शन नियन्त्रण बाहिर गएपछि भदौ २४ मा केपी शर्मा ओलीले प्रधानमन्त्री पदबाट राजिनामा दिएर बालुवाटार छाडेका थिए ।
त्यसपछिको नयाँ परिस्थिती अनुसार ६ महिनाभित्र प्रतिनिधिसभाको निर्वाचन सम्पन्न गर्नेगरी राष्ट्रपतिले कार्कीलाई नियुक्त गरेका हुन् ।