काठमाडौं – बलात्कारको आरोप लागेका मधेश प्रदेशका पूर्व प्रमुख राजेश अहिराज भन्ने राजेश झालाई पुर्पक्षमा थुनामा पठाउने अदालतले आदेश दिएको छ ।
जिल्ला अदालत काठमाडौंका न्यायाधीश पिताम्बर शर्माको एकल इजलासले यस्तो आदेश दिएको हो । पुर्पक्षका लागि थुनामा पठाउने आदेश भएसँगै उनी कारागार चलान भएका छन् । उनलाई डिल्लीबजार कारागार चलान गरिएकाे हाे ।
युवती बलात्कारको आराेपमा उनी पक्राउ परेका थिए । काठमाडौंमा घरायसी कामको सहयोगीका रुपमा ल्याएर पठनपाठनको जिम्मा लिएका अहिराजले बलात्कार गरेको जाहेरी दिएकी थिइन् ।
यसैबिच अहिराजले भने आफूलाई बलात्कारको जाहेरी दिने जाहेरीकर्ता युवतीविरुद्ध नै मुद्दा दायर गरेका छन् । बलात्कारको आरोपमा पक्राउ परेका अहिराजले बुधबार काठमाडौं जिल्ला अदालतमा जाहेरीकर्ता युवतीविरुद्ध नै मुद्दा दायर गरेका हुन् ।
अहिराजबाट पीडित भनिएकी युवतीविरुद्ध अहिराजकै जाहेरीका आधारमा आपराधिक लाभको कसुरमा मुद्दा दायर भएको सर्वोच्च अदालतका सूचना अधिकारी दिपककुमार श्रेष्ठले जानकारी दिए ।
उनका अनुसार धम्क्याउँदै २० लाख मागेको र नदिएपछि सामाजिक रुपमा बदनाम गर्नेदेखि आत्महत्या गर्नेसम्म धम्की दिँदै रकम लिएको दाबी गर्दै अहिराजले मुद्दा दायर गरेका हुन् ।