काठमाडौं – नेकपा एमाले कोशी प्रदेश कमिटीको बैठक धनकुटामा सकिएको छ । विधान संशोधन मस्यौदामाथि सुझाव संकलन गर्न कार्यदल गठन गर्दै बैठक सकिएको हो ।
प्रदेश सचिव राजकुमार भण्डारीको संयोजकत्वमा बनेको १० सदस्यीय कार्यदललाई सुझाव संकलन गर्ने कार्यादेश छ । ‘१४ वटै जिल्लाबाट आउने सुझावलाई संकलन गर्न कार्यदल बनाइएको हो ।
प्रदेश कमिटीमा २४५ जना सदस्य रहेकाले बैठकमा सुझाव राख्ने नेताहरुको संख्या सन्तोषजनक देखिदैन । अर्थात् प्रदेश कमिटीका १७ प्रतिशतले मात्र आफ्नो कुरा राखेका थिए ।
यो बैठक राख्नुको मूल प्रयोजन विधान संशोधन मस्यौदामाथि सुझाव संकलन गर्नु थियो । अझ विधानबाट ७० वर्षे उमेर हद हटाउने, पूर्वराष्ट्रपति विद्यादेवी भण्डारीलाई राजनीतिमा आउन रोक लगाउने, पदाधिकारी संख्या घटाउने जस्ता एजेण्डालाई चासोका साथ हेरिएको थियो । ‘हिजो यी विषयमा सानै संख्यामा भएपनि कुरा उठेको थियो ।
तर शेरधन राई, हिक्मत कार्की र राजेन्द्र गौतमले निर्देशनात्मक मन्तव्य राखेर बैठक सकियो’, ती नेता भन्छन् । प्रदेश इन्चार्ज राईले पार्टीको अपानि बमोजिम चल्न निर्देशन दिएका थिए ।
प्रदेश इन्चार्ज राईले मात्र नभएर प्रदेश कमिटीका अरु नेताहरुले पनि पार्टीभित्र चलिरहेको अन्तरसंघर्षबारे धेरै चासो देखाएनन् । प्रधानमन्त्री एवं पार्टी अध्यक्ष केपी शर्मा ओली र पूर्वराष्ट्रपति भण्डारी बीच चलिरहेको अन्तरसंघर्षमा जम्मा ९ जनाले आफ्नो कुरा राखेका थिए ।
होम थापा, निर्मला शिवाकोटी, मातृका भट्टराई, सन्तोष खतिवडा र खड्ग राईले ओलीको पक्षमा बोलेका थिए । उनीहरुले पूर्वराष्ट्रपति भण्डारीलाई राजनीतिमा रोक लगाउने, पार्टी सदस्यता नवीकरण नगर्ने र ओलीलाई नै नेतृत्वमा निरन्तरता दिने निर्णयमा समर्थन गरेका थिए । ‘पार्टीको सर्कुलरलाई निर्शत र निसंकोच हिसाबले कार्यान्वयन गर्नुपर्छ भन्नेमा उहाँहरको जोड थियो’, अर्का एक नेताले भने ।
उनका अनुसार रोशन बस्नेत, अञ्जु पाण्डे, डीबी कार्की र मकर खड्काले पूर्वराष्ट्रपति भण्डारीको पक्षमा बोलेका थिए । चार जना मध्ये खड्का भोजपुर एमालेका अध्यक्ष हुन् ।
अरू तीन जना प्रदेश सदस्यहरु बस्नेत, पाण्डे र कार्कीले भने पूर्वराष्ट्रपति भण्डारीको सदस्यता नवीकरण रोक्न निर्णय सच्याउन माग राखेका थिए । ‘पूर्वराष्टपतिलाई छेक्ने काम ठीक होइन । सदस्यता नवीकरण सदस्यताबारे माथिल्लो कमिटीले यो कुरा बुझ्नुपर्छ’, पाण्डेले भनेकी थिइन् । बैठक स्रोतका अनुसार अरु ३१ जना यो विषयमै प्रवेश गरेनन् ।