काठमाडौं – नेपाल महिला संघ, काठमाडौं जिल्ला कमिटीले बहुविवाह गर्न पाउने व्यवस्थासहितको मस्यौदा तयार भएको भन्दै कानुन, न्याय तथा संसदीय मामिलामन्त्री अजय कुमार चौरासियालाई ज्ञापन पत्र बुझाएको छ ।
मंगलबार सिंहदरबास्थित मन्त्री चौरासियाको कार्यकक्षमा पुगेर कमिटीका सदस्यहरूले ज्ञापन पत्र बुझाएका हुन् ।
यस्तो कानुनको मस्यौदाले विभिन्न नाममा आन्दोलनबाट प्राप्त अधिकारहरू तुहाउने प्रायस भइरहेको संघले ज्ञापन पत्रमा उल्लेख गरेको छ ।
‘कहिले राजनितिक प्रतिनिधित्वमा गठबन्धनको कारण सहभागीता घटने, कहिले विवाहको उमेर घटाएर महिलाहरुलाई उत्पादन सम्बन्धसँग जोडिन र घरको चौघेराबाट बाहिर आउन नसक्ने वातवरण सृजना गर्ने, कानुनी व्यवस्था जस्ता प्रयासहरू भइरहेका छन्,’ ज्ञापन पत्रमा उल्लेख छ ।
पितृसत्तात्मक सामाजिक संरचनाले महिलाहरू शक्ति, सत्ता र सम्पत्तिबाट वञ्चित भएको भन्दै उनीहरूले महिलाहरू सधैँ दासको रुपमा व्यवहार गर्ने बाटो खुलाउने ज्ञापन पत्रमा उल्लेख छ ।
‘यस परिस्थितिमा अहिले नेपाल सरकार कानुन, न्याय तथा संसदिय मन्त्रालयले ल्याउन लागेको कानुनी व्यवस्थाले महिला समानताको नाममा अमुक व्यक्तिहरूको अवाञ्छित इच्छा पूरा गर्ने देखिएको छ र महिलाहरूलाई सधैं दासको रुपमा व्यवहार गर्न बाटो खुलाउने देखिन्छ,’ ज्ञापन पत्रमा भनिएको छ, ‘त्यसैले, नेपाल सरकार कानुन मन्त्रालयले हाल ल्याउन लागेको उक्त पश्चगामी कानुन तत्काल रोक्न जोडदार माग गर्दछौं ।’