काठमाडौं – गण्डकी प्रदेशको ‘लाइफलाइन’ मानिएको बेनी–जोमसोम–कोरला सडक मङ्गलबारदेखि रातको समयमा बन्द हुने भएको छ ।
जिल्ला सुरक्षा समिति मुस्ताङको बैठकले आजदेखि लागू हुने गरी साँझ ६ देखि बिहान ५ बजेसम्म मुस्ताङलाई राष्ट्रिय राजमार्गसँग जोड्ने सडकखण्ड रातको समयमा अर्को सूचना जारी नहुदाँसम्म बन्द गर्ने निर्णय गरेको हो ।
मुस्ताङका प्रमुख जिल्ला अधिकारी विष्णुप्रसाद भुषालले रातको समयमा बाढीपहिरोका कारण जनधनको क्षतिको उच्च जोखिमलाई मध्यनजर गरी ७६ किलोमिटरको बेनी–जामसोम सडकखण्ड बन्द गरिएको बताए ।
जिल्ला सुरक्षा समिति म्याग्दीसँग समेत समन्वय गरी म्याग्दीबाट समेत रातको समयमा सवारीसाधन मुस्ताङ नपठाउने सहमति भएको प्रजिअ भुषालले बताए । बेनीबाट जोमसोम जाने सवारीसाधनलाई साँझ धार्मिकस्थल गलेश्वर क्षेत्रमा र मुस्ताङबाट बेनी आउने सवारीसाधनलाई घाँसामा रोकिने छ । दुईतर्फबाट बिहान ५ बजेपछि मात्र सवारीसाधन छुट्ने छन् ।
मुस्ताङ जाने सवारीसाधन साँझ ५ः३० बजेभित्र मुस्ताङको सिमानामा पुगिसक्नुपर्ने छ भने मुस्ताङबाट बेनी आउने सवारीसाधन बेलुकी ६ बजेभन्दाअघि नै छुट्नुपर्नेछ ।