काठमाडौं – विद्यालयको रकम हिनामिना गरेको अभियोगमा विशेष अदालतले सप्तरीको शंकर माध्यमिक विद्यालयका तत्कालीन प्रधानाध्यापक दिलीपकुमार गुप्तालाई १८ महिना कैदको फैसला गरेको छ।
यसै मुद्दाका प्रतिवादी तथा उक्त विद्यालयका मुखिया श्रवणकुमार चौधरी र शिक्षक हृदयराम चौधरीलाई भने सफाइ दिइएको छ। विशेषका अध्यक्ष टेकनारायण कुँवर तथा सदस्यहरू रामबहादुर थापा र रितेन्द्र थापाको इजलासले यस्तो फैसला गरेको हो।
गुप्ताले शौचालय निर्माणमा ६२ हजार रुपैयाँभन्दा बढी भ्रष्टाचार गरेको भेटिएको थियो। साथै, पिसिएफ अनुदानबापतको शिक्षकको तलब एक लाख ५० हजार रुपैयाँभन्दा बढी आफैँले अनियमितता गरी राखेको पुष्टि भएको छ। विशेषका अनुसार छात्रवृत्तिबापतको तीन लाख १० हजार रुपैयाँ पनि उनले नै हिनामिना गरेका छन्।
विशेषका अनुसार पाठ्यपुस्तकबापतको एक लाख २६ हजार रुपैयाँभन्दा बढी रकमको बिल भरपाई भेटिएको छैन भने भएको पनि नक्कली रहेको पुष्टि भएको छ। यसरी प्रधानाध्यापक गुप्ताले झन्डै साढे ६ लाख रुपैयाँ भ्रष्टाचार गरेको भेटिएको हो।
यसै समयमा विद्यालयको खाताबाट ४८ लाख ३२ हजार रुपैयाँ निकालिएको र पछि फेरि विद्यालयको खातामा राखिएको भेटिएको थियो। यी सबैमा गुप्ताको बदनियत देखिएको भन्दै उनलाई सजाय सुनाइएको हो। बिगो रकम उनीबाट असुलउपरसमेत हुने भएको छ।