काठमाडौं – कृष्ण जन्माष्टमीको भोलिपल्ट निकालिने राधाकृष्ण रथयात्रा विराटनगरमा आज दिउँसो निकालिदैछ ।
दिउँसो ३ बजेबाट सुरु हुने रथले बजार क्षेत्रको ९ किलोमिटर यात्रा तय गर्ने छ भने नगर परिक्रमा गर्दा ४३ स्थानमा विश्राम लिइनेछ ।
५८ औं संस्करणको रथयात्रा विराटनगर–१ को राधाकृष्ण मन्दिरबाट सुरु भइ तीनपैनी, मेनरोड, ट्राफिक चोक, महेन्द्र चोक, रोड शेष चोक हुँदै बरगाछी भएर पुनः मन्दिरमा पुगेर समापन हुनेछ ।
रथयात्रामा नेपाल भारतका हजारौं भक्तजन सहभागी हुन्छन् । रथयत्राका लागि प्रदेश सरकारले कोशी प्रदेशको झापा मोरङ र सुनसरीमा विदा दिएको छ ।
विक्रम संवत १९८८ मा विराटनगर महानगरपालिका–१ मा राधाकृष्ण मन्दिरको स्थापना भएको थियो । सोही वर्ष कृष्ण जन्माष्टमीको भोलिपल्ट खटयत्रा निकालिएको थियो । २०२५ सालमा विराटनगरका भूपालमानसिंह कार्की र सत्यनारायण धनावतको पहलमा रथयात्राको सुरुवात भएको थियो । त्यसयता निरन्तर रथयात्रामा रथसँगै खटलाई पनि नगर परिक्रमा गराइन्छ ।