काठमाडौं – वीरगन्ज महानगरपालिकाको केही वडामा हैजा (कोलेरा) फैलिएपछि विभिन्न अस्पतालमा बिरामी भर्ना हुन थालेका छन् ।
महानगरपालिकाको वडा नम्बर ३, ११, १२ र १३ बाट हैजा (कोलेरा)का बिरामी अस्पतालमा भर्ना भएका हुन् ।
शनिबार साँझसम्म वीरगन्ज महानगरको चार वडाका ४१ जनामा हैजा संक्रमण पुष्टि भइसकेको स्वास्थ्य कार्यालय पर्साका जनस्वास्थ्य अधिकृत जयमोद ठाकुरले जानकारी दिए ।
उनका अनुसार वीरगन्जको नारायणी अस्पतालमा १८, तराई हस्पिटलमा १२, नेसनल मेडिकल कलेजमा पाँच, अलिअर्थो सेन्टरमा चार र भवानी हस्पिटलमा दुईजना हैजाका बिरामी उपचाररत रहेका छन् । महानगरको विभिन्न वडामा हैजा समुदायस्तरमै फैलिएकाले बिरामीको संख्या बढ्दोक्रममा रहेको उनको भनाई छ ।
नारायणी अस्पतालमा झाडापखाला र हैजाका शंकास्पद बिरामी थपिन थालेपछि शय्याको अभावमा बिरामीलाई बरन्डाको भुइँमै राखेर उपचार गर्नुपर्ने बाध्यता भएको अस्पतालका सूचना अधिकारी डा. उदयनारायण सिंहले बताए । उनका अनुसार नारायणी अस्पतालमा शनिबार साँझसम्म एकजना बिरामीमा हैजाको पुष्टि भएको छ ।
अस्पतालमा हाल झाडापखाला र हैजा पुष्टि भइसकेका गरी ३० जना बढीको उपचार चलिरहेको र बिरामीको संख्या थपिने क्रम अझै जारी रहेको उनले बताए ।