काठमाडौं – तीन महिनादेखि बन्द रहेको इलामको फाल्गुनन्द सुकिलुम्बा विमानस्थल आजदेखि सञ्चालनमा आउने भएको छ।
बर्खा सुरु भएसँगै खराब मौसमका कारण बन्द भएको हवाई उडान आजदेखि पुनः सुरु हुन लागेको सुकिलुम्बा विमानस्थल इलामका स्टेसन इन्चार्ज दिनेश सुन्दासले बताए।
गत बिहीवार पनि उडान गर्ने भनिए पनि यात्रु नभएपछि उडान हुन सकेको थिएन। इन्चार्ज सुन्दासले मौसममा सुधार नआउन्जेलसम्म उडान नहुने जानकारी दिँदै साताको प्रत्येक बिहीवार उडान गर्ने योजना रहेको बताए।
नेपाल एयरलाइन्सले २०७९ माघ १ गतेदेखि काठमाडौँ–इलाम–काठमाडौँ उडान भर्दै आएको थियो। यसअघि नेपाल एयरलाइन्सले सातामा आइतवार र बिहीवार दुई वटा उडान गरेको भए पनि अब भने बिहीवार मात्रै हुने जनाइएको छ।