काठमाडौं – मलेसियामा जारी एसीसी यू–१६ इस्टजोन कप क्रिकेट प्रतियोगिताको उपाधि नेपालले जितेको छ । आज (शनिबार) भएको फाइनलमा सिङ्गापुरलाई २ विकेटले हराउँदै नेपालले उपाधि जितेको हो ।
सिंगापुरले दिएको ११४ रनको लक्ष्य नेपालले २८.५ ओभरमा ८ विकेट गुमाएर पूरा गरेको हो । नेपालका लागि जोय थापाले अविजित २४ रन बनाए । ९२ रनमा ८ विकेट गुमाएको नेपाललाई थापाले जिततर्फ दोहोर्याएका थिए ।
नेपाल हालसम्म प्रतियोगितामा अपराजित छ । सिङ्गापुर भने समूह चरणमा नेपालसँग पराजित भएको थियो ।
नेपालले पहिलो सेमिफाइनलमा मलेसियालाई हराएको थियो भने सिङ्गापुरले अर्को समूहको विजेता टोली हङकङलाई हराएको थियो । प्रारम्भिक चरणमा नेपाल र सिङ्गापुर एउटै समूहमा थिए । समूह चरणको आफ्नो पहिलो खेलमा नेपालले सिंगापुरलाई ६ विकेटले हराएको थियो ।
समूह ‘ए’ बाट नेपाल चारवटै खेल जित्दै आठ अंकसहित पहिलो र सिङ्गापुर दोस्रो हुँदै सेमिफाइनलमा पुगेका थिए । जारी प्रतियोगितामा नेपाली टोलीले हालसम्म सबै खेल जितेको छ ।