काठमाडौं – धरान उपमहानगरपालिकाले आर्थिक वर्ष २०८२/०८३ को डेढ महिना बित्न लाग्दासमेत बजेट ल्याउन सकेको छैन। स्वतन्त्र मेयर हर्कराज राई (हर्क साम्पाङ) ले आफ्नो अडान छाड्न नसक्दा र दलहरूबीच असहमति हुँदा धरानमा बजेट आउन नसकेको हो।
बजेट, नीति तथा कार्यक्रम पारित गर्ने एजेण्डासहित बुधबार बसेको धरानको कार्यपालिका बैठक बजेट टेबुल नै हुन नसकेपछि भदौ १३ गतेसम्मका लागि स्थगित भएको छ।
उपप्रमुख आइन्द्र विक्रम बेघा संयोजक रहेको राजस्व परामर्श समितिले एक अर्ब ६० करोड हराहारीमा बजेट बनाउन प्रस्ताव गरेपनि स्रोत अनुमान तथा सिलिङ समितिले भने बजेट वृद्धि गरेर २ अर्ब २० करोड ७४ लाखको ल्याउने निर्णय गरेको थियो।
स्वतन्त्र मेयर साम्पाङको विपक्षमा लामो समयसम्म उभिएका प्रमुख राजनीतिक दलहरूबीच बजेटको विषयमा फुट आएको छ। उपमहानगरपालिकाको कार्यपालिका र नगरसभामा बहुमत रहेको नेकपा एमाले एकातिर उभिँदा, मेयर साम्पाङसँग उपमेयर उपमेयर बेघा नेतृत्वको माओवादी र नेपाली कांग्रेस खुलेरै सहकार्य गर्ने स्थितिमा पुगेका छन्।
कांग्रेस-माओवादीले स्रोत अनुमान तथा सिलिङ समितिले तयार पारेको २ अर्ब २० करोड ७४ लाखको बजेट पारित गरेर अघि बढ्नुपर्ने, मेयर भिजन र उपमेयर भिजनसहितको संरचना यथावत् राख्नेजस्ता अडान लिएका छन्। तर, बहुमत सदस्य रहेको एमालेको समर्थनबिना कार्यपालिका र नगरसभामा बजेट पारित हुने सम्भावना छैन।