काठमाडौं – अन्नको भण्डार मानिने मधेशमा यस वर्ष वर्षा नभएपछि धान रोपाइँ प्रभावित भएको छ ।
समयमै वर्षा भएको वर्ष असार तेस्रो सातासम्म लगभग किसानले धान रोपाइँ सकिने समयमा यस वर्ष खेत सुख्खा छ । चर्को घामले धानको बीउ पनि सुक्न थालेको छ ।
धेरै किसानले रोपाइँ सुरु पनि गर्न सकेका छैनन् । केहीले भने भूमिगत सिँचाइको भरमा धानको बीउ जोगाएर धान रोप्न त सुरु गरेका छन् । तर बीउ र रोपेको धान खेतमा पानी टिकाउन किसानलाई धौ धौ परेको छ । भूमिगत सिँचाइबाट जति पानी हाले पनि एक/दुई दिनमै सुक्ने गरेको किसानहरू बताउँछन् ।
मधेस प्रदेश र स्थानीय सरकारले कृषि क्षेत्रलाई प्राथमिकतामा राखेर बजेट ल्याउने गरिएपनि खासै उपलब्धि देखिने गरेको छैन । सिँचाइमा ठूलो रकम लगानी गरिन्छ । तर सिँचाइ क्षेत्र बढिरहेको छैन । कृषि विद्युतीकरण गरिएको क्षेत्रमा पनि सिँचाइको अवस्था दयनीय छ । खेतहरूमा विद्युतीय पोल ठड्याइएको छ । तार पनि जोगिएको छ । तर लाइन सप्लाई छैन ।
प्रदेश कृषि निर्देशनालयका अनुसार मधेशका आठवटै जिल्लामा कूल ५ लाख ७४ हजार ३६० हेक्टर खेतीयोग्य जग्गा रहेकोमा ४ लाख ५ हजार ४५० हेक्टर क्षेत्रफलमा धान रोपाइँ हुने गर्छ । जसमध्ये यस वर्ष करिब २० प्रतिशत जग्गामा भूमिगत वैकल्पिक व्यवस्था गरिएको क्षेत्रमा मात्र धान रोपाइँ भएको छ ।