काठमाडौं – स्वास्थ्य तथा जनसंख्या मन्त्री प्रदीप पौडेल हाल वीर अस्पतालमा उपचाररत छन् । शनिवार साँझ अत्यधिक ज्वरो आउने तथा ‘काम ज्वरो’ का लक्षण देखिएपछि उनलाई वीर अस्पताल भर्ना गरिएको हो।
स्वास्थ्य मन्त्रालयका एक कर्मचारीका अनुसार, मन्त्री पौडेललाई अस्पताल ल्याइएपछि डेंगु परीक्षणका लागि टेकुस्थित शुक्रराज ट्रपिकल अस्पतालमा स्याम्पल पठाइएको छ।
मन्त्री पौडेलको सचिवालयले आइतबार जानकारी दिए अनुसार, शनिबारको तुलनामा स्वास्थ्यमा सुधार आएको छ। उनी एक साता अघिदेखि नै अस्वस्थ थिए । त्यसबेला निवासमै आराम गरेका थिए।
केही सुधार भएपछि उनी थाइल्यान्डको बैंककमा आयोजित एक कार्यक्रममा सहभागी हुन गएका थिए। शुक्रबार मात्र उनी स्वदेश फर्किएका हुन् ।