काठमाडौं – खोटाङको दिक्तेल रूपाकोट मझुवागढी नगरपालिकाका अनशनरत मेयर तीर्थराज भट्टराईले आमरण अनसन तोडेका छन् ।
आइतबार शहरी बिकास मन्त्रालय र वन तथा वातावरण मन्त्रालयसंग १६ बुँदे सहमति भएपछि भट्टराईले आमरण अनसन तोडेका हुन् ।
आमरण अनसन तोड्नुअघि आइतबार माइतिघरमा वन तथा वातावरण मन्त्री ऐनबहादुर शाही ठकुरी र स्वास्थ्यमन्त्री प्रदीप पौडेलको उपस्थीतिमा १६ बुँदे सहमतिपत्रमा हस्ताक्षर भएको थियो ।
अनसन तोडिएपछि भट्टराईले जलवायु परिवर्तनको असरलाई न्यूनिकरण गर्नका लागि सवैले योगदान गर्नुपर्ने बताए । उनले आफुसंग सरकारले गरेको सहमति कार्यान्वयन हुने विश्वास व्यक्त गरे ।
सहमतिमा बाँस, स्वदेशी काठ वा नेपालमा उत्पादित स्वदेशी वस्तु वा सामग्री खरिद गरि पहिलो चरणमा वनमन्त्रालय अन्तर्गतका सबै निकायमा प्रयोग सुरु गर्ने उल्लेख छ ।
त्यस्तै वन्यजन्तुबाट भएको क्षतिको राहत वितरण निर्देशिका, २०८० को प्रभावकारी कार्यान्वयन गर्ने, जनधनको क्षतिको राहत वितरणलाई थप सरल, सहज, पारदर्शी बनाउने लगाएत सहमति भएको छ ।