काठमाडौँ – मधेश प्रदेशका मुख्यमन्त्री कृष्णकुमार यादवले विश्वासको मत प्राप्त गरेका छन्। शुक्रबार जनकपुरधामस्थित प्रदेशसभामा बसेको बैठकबाट उनले विश्वासको मत प्राप्त गरेका हुन्।
जनमत पार्टीले सरकारलाई दिएको समर्थन फिर्ता लिएपछि मुख्यमन्त्री यादवले संविधानको धारा १८८ को उपधारा २ बमोजिम विश्वासको मत लिएका हुन्।
मुख्यमन्त्री यादवले बैठकमा प्रस्तुत गरेको विश्वासको मतको प्रस्तावको पक्षमा ६२ र विपक्षमा ३६ मत परेको छ। मुख्यमन्त्रीको प्रस्तावको पक्षमा कांग्रेस, नेकपा एमाले, नेपाली कम्युनिस्ट पार्टी (नेकपा) र राप्रपाका सांसदहरूले मत हालेका छन्। बैठकमा एक सय जना सांसद थिए।
१०७ सदस्यीय प्रदेशसभामा बहुमतको संख्या पुर्याउन ५४ सांसदको समर्थन आवश्यक हुन्छ। जनता समाजवादी पार्टी (जसपा) नेपाल र जनमत पार्टीका सांसदले भने विपक्षमा मतदान गरेका छन्। प्रदेशसभामा कांग्रेसका २२, नेकपा एमालेका २४, नेकपाका १५ र राप्रपाका १ सांसद छन्।
‘मुख्यमन्त्रीले प्रतिनिधित्व गर्ने दल विभाजन भएमा वा प्रदेश सरकारमा सहभागी दलले आफ्नो समर्थन फिर्ता लिएमा २० दिनभित्र मुख्यमन्त्रीले विश्वासको मतका लागि प्रदेशसभासमक्ष प्रस्ताव राख्नुपर्नेछ,’ संविधानको धारा १८८ को उपधारा २ मा उल्लेख छ।
यादवलाई मुख्यमन्त्री नियुक्त गर्न कांग्रेसका २२, जसपा नेपालका १८, जनमतका १३, माओवादी केन्द्रका ९, लोसपाका ८ र एकीकृत समाजवादीका ७७ सांसदले समर्थन जनाएका थिए।