(काठमाडौं) – १३ औं साग अन्तर्गत पुरुष फुटबलको ड्र सार्वजनिक भएको छ । ६ टोलीलाई २ समूहमा विभाजन गरी पुरुष फुटबलको ड्र सार्वजनिक गरिएको हो ।
पाकिस्तान भने पुरुष फुटबलमा सहभागी छैन । नेपाल १२ औं सागको विजेता हो । शुक्रबार सार्वजनिक गरिएको ड्र मा आयोजक नेपालसँगै बंगलादेश र भुटान समूह ए मा परेका छन् ।
उद्घाटन खेलमा मंसिर १५ गते नेपालले बंगलादेशसँग प्रतिस्पर्धा गर्नेछ । समूह बी मा भारत, श्रीलंका र माल्दिभ्स छन् । समूहका शीर्ष २ टोलीले सेमिफाइनलमा स्थान बनाउने छन् । फाइनल खेल मंसिर २४ गते काठमाडौंको दशरथ रंगशालामा हुनेछ ।
यसैबीच, बंगलादेश, पाकिस्तान र भुटानले अन्तिम समयमा नखेल्ने बताएपछि महिला फुटबलमा आयोजक नेपाल सहित भारत, श्रीलंका र माल्दिभ्स मात्र सहभागी हुने भएका छन् । राउण्ड रोविन लिगका आधारमा हुने प्रतियोगिताको शीर्ष स्थानमा रहने २ टोलीले फाइनलमा स्पर्धा गर्नेछन् ।
नेपालले मंसिर १७ गते श्रीलंकासँग, मंसिर १९ गते माल्दिभ्स र २१ गते डिफेण्डिङ च्याम्पियन भारतसँग प्रतिस्पर्धा गर्नेछ । फाइनल खेल मंसिर २३ गते पोखरा रंगशालामा हुनेछ ।